Их Монгол Улс байгуулагдсаны 803, ардын хувьсгалын 88 жилийн ойн баяр наадмын үндэсний бөхийн барилдааны шөвгийн 16-д үлдсэн бөхчүүдээс авсан сэргээшийн шинжилгээгээр допинг илэрсэн байж болох талаар мэдээлэл тархжээ. Өмнө нь ч наадмын дараа зарим нэг бөхөөс сэргээш илэрсэн тухай шуугидаг ч тэгсхийгээд намждаг. Тэгвэл энэ удаад шөвгийн 16-гийн дөрвөн бөхөөс сэргээш илэрсэн байх магадлалтай аж. Хэн гэдэг, ямар цолтой бөхөөс сэргээш илэрсэн тухай мэдээллийг ихэд нууцалж байгаа бололтой. Баяр наадмын тухай хуулиар шөвгийн 16-д шалгарсан бөхчүүдээс сэргээшийн шинжилгээний А, Б сорьц авч Өмнөд Солонгосын итгэмжлэгдсэн лабораторид явуулсан юм. Лабораторийн шинжилгээний А сорьцын дүн эерэг гарвал Б сорьцыг шинжилгээнд явуулдаг.

Өөрөөр хэлбэл, А сорьцын дүн Б-гээр баталгаажвал тухайн тамирчин сэргээш хэрэглэсэн нь тогтоогдох ажээ. БТСГ-ын спортын анагаах ухааны албаны ерөнхий эмч Ч.Насанбатаас тодруулахад үгүйсгэсэн хариулт өгч, мэдээлэл өгөхөөс татгалзсан юм.

Улсын наадмын шөвгийн 16-д даян аварга Г.Өсөхбаяр, улсын арслан До.Ганхуяг, Д.Мөнхбаатар, улсын гарьд Н.Ганбаатар, улсын заан Ц.Соронзонболд, М.Өсөхбаяр, улсын харцага Л.Пүрэвжав, Д.Батболд, Ө.Бат-Орших, улсын начин Ц.Сумъяабээс, Д.Чинзориг, Г.Отгонбаяр, шинээр начин болсон Э.Энхбат, С.Мөнхбат, Н.Батзаяа, Ц.Содномдорж нар шалгарсан юм.

Т.Хангай