Хөрөнгийн зах зээл хурдацтай хөгжиж байгаа өнөө үед бирж дээрх үнэт цаасны арилжаанд оролцож, хөрөнгөө өсгөх сонирхолтой хүмүүсийн тоо эрс нэмэгдэж байгаа билээ.

Ялангуяа нүүрсний асар их нөөцтэй гэж тогтоогдоод байгаа Монгол орны хувьд олон улсын хөрөнгө оруулагчдын хараанд байгаа гэхэд болно. Үүнийг дагаад манай хөрөнгийн зах зээл  дээрх уул уурхайн компаниудын хувьцааны үнэлгээ өсөж, энэ зах зээл рүү орж ирэгсдийн тоо өдөр ирэх тутам нэмэгдэж байна. Харин энэхүү зах зээлийг сонирхож байгаа ч хаанаас, хэрхэн мэдээлэл авах, хэнд хандахаа мэдэхгүй хүмүүс нэлээд их байгаа нь энэ чиглэлийн мэдээлэл дэх уншигчдын санал, сэтгэгдлээс харагддаг.

Хүмүүс ихэвчлэн олон нийтийн мэдээллийн хэрэгслээр хөрөнгийн зах зээлийн талаарх мэдээлэл авдаг ч хамгийн үнэн зөв, сүүлийн үеийн мэдээллийг мэргэжлийн байгууллагын албан ёсны вэбсайтуудаас болон брокерийн компаниудын утсаар лавлаж, мөн биеэрээ очин мэргэжилтнүүдээс нь дэлгэрэнгүй мэдээлэл авах боломж бий.

Тухайлбал,

• Хөрөнгийн бирж - www.mse.mn
• Санхүүгийн зохицуулах хороо - www.frc.mn
• Үнэт цаасны төлбөр тооцооны төвлөрсөн хадгаламжийн төв - www.schcd.mn
• БиДиСек ХК - www.bdsec.mn   сайтуудаар зочлоорой.

Сүүлийн үед сайн, муугаар их яригдаж байгаа брокерийн компаниуд нь хөрөнгө оруулагчдад үнэт цаас худалдан авахад нь зуучлах, зах зээлийн үнэ ханш болон хувьцаат компаниудын талаарх мэдээллийг хүргэх, мөн хөрөнгө оруулагчдад хууль эрх зүйн зөвөлгөө өгөх үүрэгтэй газар юм.

Үнэт цаасны тухай хуулинд иргэд, аж ахуй нэгж байгууллагууд нь хөрөнгийн биржийн арилжаанд зөвхөн брокерийн компаниар зуучлуулан оролцоно гэж заасан байдаг. Энэ нь иргэн та хувьцааны данс нээх болон бусад үнэт цаасны арилжаанд оролцохдоо брокерийн компанитай л харьцана гэсэн үг.

Та брокерийн компаниар дамжуулан нээсэн данс дахь үнэт цаас /хувьцаа, бонд/ болон мөнгөн хөрөнгийг тухайн компанийн мэргэжилтэн зөвхөн таны зөвшөөрлөөр л захиран зарцуулах эрхтэй  ч мэргэжлийн ёс суртахуунгүй, ашиг сонирхлын зөрчилтэй зарим нэг мэргэжилтний буруугаас болж дампуурсан  брокерийн компаниудын гашуун туршлагууд ч  бий.

Тэгэхээр таны хөрөнгө брокерийн компаниар дамжигдан арилжаанд ордог бөгөөд та хөрөнгөө аль болох нийгэмдээ өөрийн гэсэн байр сууриа олсон, туршлагатай, санхүүгийн чадвартай мөн чадварлаг боловсон хүчнээр хангагдсан, үйлчилгээний төрөл, чанар сайн брокерийн компаниар дамжуулан хадгалж, хамгаалан арилжаанд оролцох хэрэгтэй ба сонголт маш чухал гэдгийг танд зөвлөж байна.

Одоо Монголын хөрөнгийн бирж дээр суудалтай, идэвхтэй үйл ажиллагаа явуулж байгаа 63 брокерийн компани байгаа юм. Эдгээр компанийн нэрс, хаяг, байршлын талаарх мэдээллийг та энд дарж авна уу.
 
Ч.Болор