Цагдаагийн албан хаагчийн ёс зүйн дүрэмд нэгэн шинэ өөрчлөлт орсон байна. Цагдаагийн албан хаагч согтууруулах ундаа хэрэглэсэн тохиолдолд тээврийн хэрэгсэл жолоодохыг хориглосон хууль тогтоомжийг чандлан сахина гэж.

Үүнийгээ Цагдаагийн ерөнхий газрын даргын 223 дугаар тушаалаар өнгөрсөн тавдугаар сарын 4-нд шинээр нэмж баталсан байна. Тэгэхээр батлах хүртэлх хугацаанд цагдаагийн албан хаагч архидан согтуурсан ч тээврийн хэрэгсэл жолоодохыг зөвшөөрч байсан хэрэг үү.

Цагдаа ажлын бус цагаар, дүрэмт хувцастайгаа биш бол согтуугаар машин барихыг зөвшөөрч байсан гэсэн үг үү. Энэ тухай ёс зүйн дүрэмдээ суулгаагүй, батлаагүй байсан нь "илэрч" байгаа нь энэ байх нь.

Гэтэл энгийн иргэн бага зэрэг л "үнэртүүлчихсэн" бол машиныг журамлахаас эхлээд тээврийн хэрэгсэл жолоодох эрхийг жилээр нь хасна. Харин цагдаагийн албан хаагчид согтуугаар замын хөдөлгөөнд оролцохыг хуулиар хүлээн зөвшөөрч байжээ гэж харагдахаар байна.

Цагдаагийн ёс зүйн дүрэмд нэмэлт өөрчлөлт орох болсон нь Чингэлтэй дүүргийн цагдаагийн хэлтсийн ахлах дэслэгч С.Ган-Очироос үүдэлтэй гэнэ. Тэрээр өнгөрсөн гуравдугаар сарын 9-нд согтууруулах ундаа хэрэглэсэн үедээ замын хөдөлгөөнд оролцож Ерөнхийлөгчийн тамгын газрын референт, 27-хон настай залууг дайран, амь насыг нь бүрэлгэсэн юм. Энэ байдлаас сургамжлан цагдаагийн албан хаагчийн ёс зүйн дүрэмд нэмэлт оруулж, цагдаа согтууруулах ундаа хэрэглэсэн үедээ машин барих "эрх"-ийг нь сая нэг юм хаажээ.

Д.Гэрэл