АНУ-ын тамхины таван үйлдвэр Хүнсний бүтээгдэхүүн, эм тарианы чанарын хяналтын газраас тамхины хайрцган дээр тус бүтээгдэхүүний хор уршгийг харуулсан аймшигтай зургууд байршуулах гэсэн хуулийн заалтад өөрчлөлт оруулахыг шаардаад байна.

2009 онд гаргасан хуулийн дагуу Америкийн тамхины үйлдвэрлэгчид 2012 оны есдүгээр сараас эхлэн хайрцган дээрээ тамхины хор уршгийг харуулсан зураг байршуулах болоод байгаа юм.  Тэд гэмтсэн уушги, харласан шүд болон нас барсан байдалтай хүний зургууд тавих ёстой юм байна. Хайрцагны дээд хагаст тийм зураг тавьж, үлдсэн талбайд тамхи болоод үйлдвэрийн нэр бичигдэх ёстой гэнэ.

RJ Reynolds Tobacco компани (Camel, Winston-ы үйлдвэрлэгч), Lorillard Tobacco (Newport, True), Commonwealth Brands (Davidoff, West), Liggett Group, Santa Fe Natural Tobacco зэрэг компаниуд тус хууль тэдний эрх чөлөөг боогдуулж байна гэж үзэж байгаа юм. Тэд тамхины хор уршгийн тухай аймшигтай харагдах зургууд хэрэглэгчдийг айлгаж, тэдний бүтээгдэхүүнийг худалдаж авах хүсэлгүй болгоно гэжээ. “Засгийн газар тамхинаас урьдчилан сэргийлэх мэдээлэл түгээх эрхтэй ч биднээс тамхины хайрцгийг тамхины эсрэг кампанит ажлаа сурталчлах зар сурталчилгааны орон зай болгохыг шаардах ёсгүй” гэжээ.

АНУ-ын Эрүүл мэндийн сайд Кэтлин Сибелиус тамхины эсрэг шинэ журмууд залуу хүнийг тамхичин болохгүй байхад нь, харин тамхинд орогсодыг хорт зуршлаасаа салахад нь туслах болно гэжээ.

Өнгөрсөн онд тамхи үйлдвэрлэгчид ийм хэргээр шүүхдээд ялагдаж байсан юм байна.

А.Цацрал