Байгаль орчин аялал жуулчлалын яам, Цэнгэг усны нөөц байгаль хамгаалах төв, Нийслэлийн боловсролын газар хамтран “Ногоон  паспорт” санаачлагыг хэрэгжүүлнэ.

Ерөнхий боловсролын сургуулийн ахлах ангийн сурагчдын дунд “Хаягдал зай хураах хайрцаг бүтээх” уралдааныг зарлалаа. Бүтээлийг Цэнгэг усны нөөц байгаль хамгаалах төвд энэ  сарын 15-ны 17.30 цаг хүртэл хүлээн авна.

Хайрцгийг хэт том хэмжээтэй хийхгүй бөгөөд загвар материалын хувьд ямар ч байж болно.

Энэ сарын 17-нд шалгарсан бүтээлийг зарлан, “Эко клубуудын чуулганыг Нийслэлийн боловсролын газар, Байгаль орчин аялал жуулчлалын яам, Нийслэлийн байгаль орчны газар хамтран “Найрамдал” олон улсын хүүхдийн цогцолборт зохион байгуулах юм.

Уралдааны талаар нийслэлийн бүх сургуульд удирдамж хүргүүлэх бөгөөд удирдамжид бүх шалгуур, танилцуулга, дүгнэх оноо бий аж. 

Шагнал:

• Нэгдүгээр  байр 1 сая төгрөг,
• Хоёрдугаар байр 500 мянга,
• Тусгай байр шалгаруулна.

Судалгаагаар нэг хүн жилд дунджаар 11 зай ашигладаг гэнэ. Манай улс 2017 оны гаалийн мэдээгээр 4.5 тэрбум төгрөгийн 12.5 сая ширхэг зай импортолжээ. Эдгээрийг эргүүлэн хилээр гаргахгүй учир аюултай хог болон үлдэх юм.

Тус уралдааны зорилго нь дууссан зайгаа нэг газар хаяж бөөгнүүлснээр зориулалтын дагуу устгах, дахин боловсруулах байна.

ЦУНБХТ-ийн захирал Г.Номин:
“Хайрцгийг бүх дунд сургуульд байршуулж дууссан зай, аюултай хогийг цуглуулж, дахин боловсруулах дадал зуршлыг хүүхдүүдэд төлөвшүүлэх зорилготой. Энэ бол олон улсын жишиг бөгөөд их үр дүнтэй арга” гэж ярив.

Нэг ширхэг зай 4 м кв хөрс, 8000 литр усыг бохирдуулдаг юм байна.

С.Отгонжаргал