-Танайд сүүлийн үед дуудлага хэр байна вэ?
-Ер нь сүүлийн өдрүүдэд халсанаас болж дуудлага ихсэж байна. Өнөөдөр ажлын өдөр ч өглөөнөөс хойш 100 гаруй дуудлага иржээ. Уг нь ажлын өдрүүдэд дуудлага амралтын өдрүүдийнхээс харьцангуй бага байдаг юм.

-Иргэдийн юу нь өвдснөөс дуудлага өгч байна?
-Яаралтай түргэн тусламжинд ирдэг нийт дуудлагын 80 хувь нь Даралт ихсэх, нарны хордлого, ходоод гэдэсний хямралаас болсон байдаг. Харин үлдсэн 20 хувь нь ямар нэгэн аваар осол, гэмтэж бэртэх зэргээс болж ирдэг юм. Сүүлийн өдрүүдэд нэлээд халж байгаа тул даралт нь ихэсдэг, зүрх нь өвддөг хүмүүс эмээ байнга хэрэглэхийг зөвлөж байна. Мөн нарны хордлого авахгүйн тулд наранд явахгүй байх хэрэгтэй. Наранд явахаар бол толгойгоо байнга норгож байгаарай.

-Дуудлага ихсэж байгаа үед эмч, машин техник хүрэлцээтэй байна уу?
-Өдөртөө 15 эмч 16 машин ажиллаж байна. Харин шөнөдөө 19 эмч, 20 машин болж нэмэгдэж ажиллаж байна. Нөөц бололцоогоороо ажиллаж байна. Гэхдээ бас хүрэлцэхгүй тал гарна. Манай 103 утсан дээр мэргэжлийн эмч нар суудаг болохоор ямар шинж тэмдэг илэрч байгаа, хэдэн настай зэргийг нь асууж байгаад анхан шатны тусламж үзүүлэх зөвлөгөө өгдөг. Гэхдээ бас сүүлийн үед хүмүүс биед нь ямар нэгэн зовиур илрэх юм бол түргэн тусламж дууддаг болжээ. Уг нь эхлээд өрхийн эмчдээ үзүүлэх ёстой. Даралт ихтэй, зүрх нь өвддөг суурь өвчтэй хүмүүс өрхийн эмчийн хяналтан доор байнга эмээ хэрэглэх ёстой. Өрхийн эмчдээ үзүүлэхгүйгээр шууд манайд хандаад байгаа нь бидний ачааллыг ихэсгэх хандлагатай байна. Манайх чинь нийслэлийн хэмжээнд үйл ажиллагаа явуулдаг учраас өрхийн эмнэлгүүд бидний ачааллаас хөнгөлж байдаг.

Ш.Доржсүрэн