Клиникийн II эмнэлгийн Мэдрэлийн тасгийн их эмч Т.Болормаатай уулзаж толгойн өвчний талаар зөвлөгөө авлаа.

-Толгой өвдөх нь ихэнх хүмүүст тохиолд­дог. Ер нь ямар өвчний үед толгой өвдөж болох вэ?
-Толгой өвдөх нь олон шалтгаантай. Анхдагч шалт­гаан гэхээр судасны нарий­сал, судасны урсгалын хурд саадтай байгаа эсэх гэх зэр­гээс шалтгаалдаг бол толгой, хүзүү, нурууны булчин чан­гар­снаас толгой өвдөж бол­но. Ер нь мэдрэлийн өвчин  болон дотрын өвчний үед толгой өвдөж болно.  Дотрын өвчин ялангуяа элэгний өвч­ний үед  ямар нэгэн эрхтэн тэнцвэрт байдлаа алдаж эм­гэг байдалд хүрэхэд мэдрэл сульдлын хам шинж болдог. Тэрний нэг шинж нь толгой өвдөх.

-Толгой өвдвөл хэнд хандах ёстой вэ. Эсвэл гэрийн нөхцөлд яаж эмчлэх вэ?
-Толгой өвдөж эхэлбэл мэдээж мэдрэлийн эмчид хандана. Толгой  өвдөлт тас­ралтгүй үргэлжлэх үед өвчин намдаах эм ууж болно. Бид­ний хэрэглэж заншсан пара­цетамол, цитармон гэх мэт эмүүд өвчин намдаах боловч гаж үйлчлэл ихтэй. Жишээл­бэл, парацетамол удаан хуга­цаагаар уувал элгэнд муу нөлөөтэй. Кали биеэс их гадагшлуулснаас шөрмөс их татдаг.

-Эм уулгүйгээр толгойн өвдөлтийг намдаах ямар арга байдаг вэ?
-Уламжлалт эмчилгээний аргууд байна. Толгойд иллэг, бариа хийх нь ач холбог­долтой. Иллэг хийхэд толгой дахь  чангарсан булчингуудыг суллах үйлчилгээтэй. Су­дасны агшилтыг тавиулж, цусан хангамжийг сайж­руулс­наар толгойн өвдөлтийг намдаах үйлчилгээ үзүүлнэ. Толгой өвдөхөд мөн цэвэр агаарт гарч, толгой өвдөхөд хүргэсэн хүчин зүйлээс зайлс­хийх хэрэгтэй. Стресс үүсгэж байгаа хүчин зүйлүүд тархи толгойд нөлөөлснөөр толгой өвдөх, цаашдаа бие даасан толгойн өвчин үүсэх уршигтай байдаг. Үүнээс сэргийлэхийн тулд дасгал хөдөлгөөн хийх нь нэмэр болно.

-Танил эмэгтэй маань толгой өвдөхөөр шоколад ид гэж зөвлөдөг. Шоколад идсэний дараа түүний тол­гой өвдөхөө больдог гэнэ лээ. Үнэхээр шоколад өв­чин намдаах үйлчилгээтэй юу?
-Үгүй л дээ. Шоколад ха­рин ч толгойн өвдөлтийг сэд­рээдэг. Жишээлбэл, толгой таллаж өвдөх үед  шоколадны төрлийн зүйл өвчин сэдрээдэг эсрэг заалттай. Ямар нэгэн хоол хүнсний  зүйл идээд толгойн өвдөлт дарагдаж байна гэдэг бол хооллолтын хоорондын зай холдсоноос болсон байж магадгүй.

-Толгой таллаж өвдөөд гэсэн үг их дуулддаг л даа. Юунаас болох вэ?
-Толгой таллаж өвдөх нь маш их түгээмэл. Эмэгтэй­чүү­дэд давамгай тохиолддог. Сарын тэмдэг ирэхээс өмнө толгой таллаж өвддөг удамш­лын гаралтай өвдөлтүүд бай­даг. Энэ өвчин бүрэн эдгэ­дэг­гүй. Огилт, бөөлжилт  үүсгэдэг дагалдах шинжүүдтэй.     

-Хүмүүс ихэвчлэн ямар шалтгаанаар толгой өвд­сөн гэж тайлбарладаг вэ?
-Ядрах, хэт ачаалалтай үед, халуун нартайд, маш их стрессийн дараа толгой өвддөг гэж хүмүүс ярьдаг. Стресс үүсгээд байгаа хүчин зүйлүүдээс зайлсхийх нь чухал.        

-Мэдрэлийн ядаргаанд орлоо гэцгээдэг. Энэ ямар учиртай өвчин бэ?
-Хүнд бие хүний хэрэгцээ, хоол ундны  хэрэгцээ, физио­логийн, нийгмийн хэрэгцээ гэж байдаг юм байна. Энэ хэрэгцээ алдагдаад стрес­сийн байдалд ороод ирэхээр  мэдрэлийн ядаргаа үүсдэг. 

-Заримдаа хүмүүс маш их мартамхай болох үе байдаг. Мартамхай байна гэдэг мэдрэлийн өвчинтэй холбоотой юу?
-Мартана гэдэг хүнд байх хэвийн асуудал. Гэхдээ  зарим хүн барин тавин юмаа мартаад "Өө би тийм юм хийх ёстой байсан шүү дээ" гээд байвал ерөнхийдөө тархины үйл ажиллагаа алдагдаж байна гэдгийг илрүүлдэг.