Н.Бат-Эрдэнэ: Монгол уран бүтээлчдийн дуу хөгжмийн санг албан ёсны эрхтэйгээр ашиглах боломжтой

Монголын хамтлаг, дуучдын уран бүтээлүүдийг дотоодын болон гадаадын зах зээлд албан ёсны эрхтэйгээр нийлүүлэх үйлчилгээг зургаа дахь жилдээ үзүүлж буй “Монгол контент” ХХК-ийн Хөгжмийн хэлтсийн менежер Н.Бат-Эрдэнэтэй ярилцлаа. Тэрээр контент үйлдвэрлэл, хөгжмийн салбарт ажиллаад 14 жил болж буй аж.

“Mongol music” үйлчилгээнд мянга гаруй хамтлаг, дуучны 18 мянга гаруй дуу, хөгжим, контент багтдаг байна. Бид хөгжмийн зах зээлийн өнөөгийн чиг хандлага, уран бүтээлчидтэй хэрхэн гэрээ байгуулан орлого хуваарилдаг тухай болон хөгжмийн бизнесийн боломжийн талаар ярилцлаа.

-“Монгол контент” ХХК хөгжмийн бизнес рүү хөл тавих шалтгаан юу байсан бэ. Тухайн үеийн хөгжмийн салбарын нөхцөл байдал ямар байсан бол?
-Манай компани өмнө нь зөвхөн “Мобиком” корпорацийн гар утсанд зориулсан хөгжмийн “HiTone” үйлчилгээг хариуцан, дуу хөгжим, контент нийлүүлэн  ажиллаж байсан. Хөгжмийн бизнест рэкорд студи, лэбэл, паблишинг компани, хөгжмийн дистрибушн гэх зэрэг тусдаа бие даасан бүтцүүд байж бие биеийнхээ үйл ажиллагааг дэмжин ажилладаг. Харин манайд ийм бүтцүүд хараахан бий болж амжаагүй байсан. Тиймээс бид 2015 оноос гэрээт уран бүтээлчид, контентын сан дээрээ тулгуурлан Music distribution буюу дуу хөгжмийн түгээлтийн үйлчилгээг эхлүүлэн уран бүтээлчдийн бүтээлийг дуу хөгжим ашиглагч бүхий л байгууллагуудад нийлүүлэх боломжтой үйл ажиллагааг явуулах болсон.

Ингэснээр уран бүтээлчид манай үйлчилгээг ашиглан өөрийн уран бүтээлээ дуу хөгжим ашиглагч нарт нийлүүлж, тухайн дууг ашиглаж олсон орлогоос рояалти буюу бүтээлийн орлогоо авах, нөгөө талд дуу хөгжим ашиглагчид нэгдсэн нэг сувгаас Монгол уран бүтээлчдийн дуу хөгжмийн санг албан ёсны эрхтэйгээр ашиглах боломжтой юм. Нэг ёсондоо уран бүтээлчид болон дуу хөгжмийг ашиглах хэрэгцээ бүхий байгууллагыг холбосон гүүр, нэг цэгийн үйлчилгээ гэж ойлгож болно.

-Одоо танай үйлчилгээг хэдэн уран бүтээлч ашиглаж байна вэ?
-Өнөөдрийн байдлаар бид 500 гаруй эрх эзэмшигчтэй хамтран ажиллаж байна. Үүнд хамтлаг, дуучин, уран бүтээлчдээс гадна студи, продакшн, лэбэлүүд багтдаг. Манай компани нийтдээ төрөл бүрийн урсгал, жанрын мянга гаруй уран бүтээлчийн 18,000 орчим дуу, хөгжмийг Монголынхоо дөрвөн оператор болон Өвөрмонголын “Эгшиг” компанид нийлүүлж байна.

Монголд дуу хөгжмийг албан ёсны эрхтэйгээр авч, хэрэглэж буй байгууллагууд тун цөөн байдаг. Сүүлд “М Music” хөгжмийн стрим үйлчилгээ нээгдсэн. Бид уран бүтээлчдийнхээ дууг гэрээний дагуу “М Musiс”-т нийлүүлэн ажиллаж байна.

Танайхтай гэрээ байгуулж дуугаа нийлүүлэхийг хүссэн уран бүтээлч ямар алхам хийх шаардлагатай вэ. Мөн тухайн уран бүтээлчид орлогыг нь хэрхэн хуваарилдаг бол?
-Тухайн дуу хэдэн хүнд хүрч, хэдэн хүн татаж авсан, сонссон гэдгээс шалтгаалан уран бүтээлчдийн орлого харилцан адилгүй байдаг. Бид саяхан mongolmusic.mn сайтаа албан ёсоор нээсэн. Уран бүтээлчид энэ сайт руу өөрийнхөө эрхээр нэвтэрч, уран бүтээлүүдээ дуу хөгжим ашиглаж байгаа үйлчилгээнүүдээр дамжуулан хэчнээн хүнд хүрч, хэдэн удаа хүмүүс татаж авсан байна, хэдэн төгрөгийн орлого олсон гэх зэрэг бүх мэдээллийг цогцоор нь харах боломжтой. Энэ нь яг л шилэн данстай адил.

Цар тахлын нөхцөл байдалтай уялдуулан бид энэ сайтаараа дамжуулан уран бүтээлчидтэй цахимаар гэрээ байгуулж, дуу хөгжмөө түгээх боломжийг нээсэн. mongolmusic.mn сайтаар зочлон гэрээний нөхцөл, шаардлагуудтай нээлттэй танилцаж болно.

-Тэгэхээр ямар дуу нь олны хүртээлд их хүрнэ, тухайн уран бүтээлч өндөр орлого хүртэх нь ээ?
-Тийм ээ. Энэ нь зах зээлийн хуулиар зохицуулагддаг. Олны анхаарлыг татсан, сонсох дуртай уран бүтээл болж чадвал төдий хэмжээгээрээ дууныхаа нэг удаагийн сонсолт бүрээс л орлого хүртэнэ гэсэн үг юм. Хэрэглэгчийн сонголтын дагуу л ямар уран бүтээлч өндөр ашиг хүртэх нь тодорхойлогдоно.

ӨВӨРМОНГОЛД МОНГОЛЫН ДУУЧДЫН УРАН БҮТЭЭЛИЙГ СОНСОХ АЛБАН ЁСНЫ АППЛИКЭЙШН НЬ “ЭГШИГ” ЮМ

-Сүүлийн үед сонсогчдод хамгийн их хүрч буй уран бүтээлүүдийн талаар сонирхуулбал?
-Дуучин Б.Баяндалайгийн “Би өөрийнхөөрөө”, Д.Уранзаяагийн “Чамдаа”, Наки, Хишигдалай нарын “Зүрхний тал”, Rokit Bay “Хязгааргүй” зэрэг дуу гар утас хэрэглэгчдийн дунд эрэлттэй, хамгийн их татаж авсан дуунд багтаж байна.

-Өвөрмонголын “Эгшиг соёл медиа” компанитай хэрхэн хамтран ажиллаж эхэлсэн бэ?
-Хөгжмийн зах зээлд стрим буюу нэг аппликэйшнаар дамжуулан дуу, хөгжмийг хязгааргүй сонсох боломжтой үйлчилгээнүүд олон бий. Өвөрмонголын “Эгшиг соёл медиа” компанийнхан өөрсдийн дуу хөгжим сонирхогч нарт зориулсан Өвөрмонголын болон Монголын уран бүтээлчдийн дууг багтаасан аппликэйшн хөгжүүлж, зах зээлд гаргасан. Тэд монгол дуу хөгжмийн сангаа албан ёсны эрхтэйгээр бүрдүүлэх, уран бүтээлчдэд орлого хуваарилахаар манайд хандсан юм. Ингээд “Монгол контент” ХХК, “Эгшиг соёл медиа” компани хамтарч ажиллах онцгой эрхтэй гэрээ байгуулсан. 2020 оны нэгдүгээр сараас “Эгшиг” аппликэйшнээр Өвөрмонголын сонсогчдод хүрсэн дуу бүрийн орлого Монголын уран бүтээлчдэдээ хүрч эхлээд байна. Монгол бичгээр бичсэн тайлбартай уг аппликэйшнд одоогоор манай 250 гаруй уран бүтээлчийн 5000 гаруй дуу ороод буй юм.

-Манай уран бүтээлчдийн дуу Өвөрмонголд хэр олон хүнд хүрдэг бол гэдэг нь сонирхолтой юм.
-Цар тахал гараагүй байхад манай уран бүтээлчид Өвөрмонголд тоглолт их хийдэг байсан. Тодорхой хэмжээнд өөрсдийн зах зээл, сонсогчдын хүрээлэлтэй. Уран бүтээлчид маань манай үйлчилгээгээр дамжуулан өөрийн бүтээлээ “Эгшиг” үйлчилгээнд нийлүүлснээр Өвөрмонголын сонсогчдод дуугаа хүргэх, тэдэнд танигдах гарц нээгдэж буй юм. Өвөрмонголд youtube, facebook зэрэг олон нийтийн сүлжээ ашигладаггүй учир Монголын дуучдын уран бүтээлийг сонсох албан ёсны аппликэйшн нь “Эгшиг” юм.

Манай компанийн зүгээс хамтран ажиллаж буй уран бүтээлчдийнхээ дууны маркетинг, идэвхжүүлэлтийг хийдэг. Цахим сүлжээ, сайтаар дамжуулан олон нийтэд хүргэдэг. Тэмдэглэлт баярын үеэр маркетингийн томоохон үйл ажиллагааг зохион байгуулдгаараа онцлогтой.

Бид Монголын уран бүтээлчдийн нэгдсэн тоглолтыг “Эгшиг” аппликэйшний нээлт  болгож Өвөрмонголд хийхээр төлөвлөсөн байсан ч цаг үеийн нөхцөл байдлаас болоод хойшлогдоод байна.

“Хурд” “Чингис хаан” хамтлаг, шинэ залуу репперүүдийн дуунууд Өвөрмонголын сонсогчдод их хүрдэг.

БИД АРГА ХЭМЖЭЭНИЙ ЗОХИОЛ, НАЙРУУЛГА, ТАЙЗ ЗАСАЛ, ХӨГЖИМ, ТЕХНИК, МАРКЕТИНГ, СУРТАЛЧИЛГАА ЗЭРЭГ ЦОГЦ ҮЙЛЧИЛГЭЭГ ҮЗҮҮЛДЭГ

-Music distribution үйлчилгээнээс гадна хөгжмийн ямар үйлчилгээ үзүүлдэг вэ. Цар тахлын үед үүнтэй хэрхэн уялдан ажиллаж байна вэ?
-Манай компани Event management буюу захиалгат эвент, үйл ажиллагааг мэргэжлийн түвшинд зохион байгуулах үйлчилгээг үзүүлдэг. Цар тахал гараагүй байхад “Мобиком” корпораци, “Оюутолгой” ХХК, “Хас банк”, “Herbalife Mongolia” зэрэг байгууллагын олон нийтэд хандсан болон байгууллага дундын төрөл бүрийн арга хэмжээг зохион байгуулсан. Бид арга хэмжээний зохиол, найруулга, тайз засал, хөгжим, техник, маркетинг, сурталчилгаа зэрэг цогц үйлчилгээг үзүүлдэг.

Цар тахлын улмаас олныг хамарсан үйл ажиллагаа зохион байгуулах боломжгүй байгаа энэ үед бид тухайн байгууллагуудтайгаа хамтран цахим эвентүүдийг зохион байгуулж байна.

Цар тахлын үеэр ч гэсэн дуучид шинэ уран бүтээл гаргасаар байгаа. Гэхдээ уран бүтээлчид тоглолт зохион байгуулах боломжгүй байгаа тул орлого нь хумигдсан. Гэхдээ дуугаа олон суваг, үйлчилгээгээр дамжуулж сонсогчдын сонорт хүргэх, орлогоо өсгөх боломжтой.

-Ярилцсанд баярлалаа.
-Баярлалаа.