Хөрсний бохирдлоос үүдэлтэй өвчилсөн хүмүүсийн 65 хувийг хүүхэд, эмэгтэйчүүд эзэлж байна гэж НБОГ-аас мэдээллээ.

Хөрсний бохирдлын үзүүлж буй хорт нөлөөг нүдээр дүгнэхэд хэцүү бөгөөд ургацын хэмжээ багасах, үүний бүтцэд нөлөөлөх зэргээр дам болон шууд байдлаар ургамалд нөлөөлдөг. Мөн хөрсийг хүнцэл, хром, хар тугалга зэргээр бохирдуулдаг нь хүний эрүүл мэндэд ноцтой аюултай.

Хөрсний бохирдоход хүний үйл ажиллагаа хамаатай. Үүнд:

• Уул уурхай, үйлдвэрлэл,
• ХАА-н гаралтай хог хаягдал,
• хортон шавьж устгалын хор,
• бордоо,
• зэрлэг ургамлын хор,
• шатахууны гаралтай бүтээгдэхүүнүүд,
• Тээврийн хэрэгслийн утаа зэрэг нь хөрсний бохирдуулдаг. 
• “Өсөн нэмэгдэж буй бохирдуулагч” буюу эмнэлгийн хорт хаягдал,
• биологийн гаралтай бохирдуулагч, хуучин цахилгаан хэрэгслийн хаягдал болон хүний бүхий л үйл ажиллагаанд хэрэглэгддэг хуванцрууд багтана. (Хөрсөнд хаягдсан хуванцрыг боловсруулах ямар ч арга байхгүй ба электроникийн гаралтай ихэнх хог хаягдлыг дахин боловсруулахын оронд устгалд оруулдаг аж)

Тиймээс та байгаль дэлхийгээ хамгаалахад дараахыг хэвшүүлэн хувь нэмрээ оруулахыг уриалж байна.

• Нэг удаагийн пластик материал, гялгар уутны хэрэглээг багасгах
• Орчин тойрноо цэвэрлэх, ил задгай хог үлдээхгүй байх
• Хог хаягдлаа багасгах, ангилан ялгах
• Ногоон орчин байгуулж мод тарих
• Ажилдаа алхаж эсвэл дугуйгаар явах
• Хоолны хаягдлыг багасгах гэх мэтчилэн байгаль орчинд ээлтэй эерэг хандлагыг хэвшүүлбэл байгаль орчноо хайрлан хамгаалж чадна.

Монгол Улс энэ жилийн Дэлхийн байгаль орчны өдрийг “Зогсооё, Залруулъя, Засая” уриан дор тэмдэглэн хүрээлэн буй орчинд сөрөг нөлөөлөл үзүүлж буй үйл ажиллагааг зогсоох, нөхөн сэргээх ажлыг эрчимжүүлэх бодлого баримтлан “Нөхөн сэргээлт-2024” нэгдсэн арга хэмжээг хэрэгжүүлж эхлүүлжээ. Хүрээлэн буй орчинд үзүүлж буй сөрөг нөлөөллийг бууруулж хүн бүр хандлагаа өөрчилж чадсанаар байгаль орчны тулгамдсан асуудлуудыг шийдвэрлэхэд хувь нэмэр оруулж эрүүл аюулгүй орчинд амьдрах нөхцөл бүрдэнэ.

Анх 1972 онд НҮБ-ын Ерөнхий чуулганаас жил бүрийн 06 сарын 5-ны өдрийг “Дэлхийн байгаль орчны өдөр” болгон тунхагласан ба жил бүрийн энэ өдрөөр байгаль орчны тулгамдсан асуудлуудад олон нийтийн анхаарлыг хандуулж, хүрээлэн буй орчныг хамгаалах олон талт арга хэмжээг зохион байгуулан дэлхий нийтээр тэмдэглэн өнгөрүүлсээр иржээ.