Тулгар Төрийн 2222 жил, Их Монгол Улсын 807 жилийн ой, Ардын хувьсгалын 92 жилийн ой, Үндэсний Их Баяр наадмыг нээж Монгол Улсын Ерөнхийлөгч Ц.Элбэгдорж үг хэллээ.

Тэрбээр, Эрхэм хүндэт ард иргэд ээ, хүндэт наадамчид аа

Монгол наадмын халуун мэндийг нийт ард түмэндээ хүргэж бүгдээрээ хотол олноороо сайхан наадахыг ерөөе.

Жил жилийн наадам сайхан болдог энэ жилийн наадам бүр ч сайхан болж байна. Дөрвөн хоёр ташраараа таарч байна. Бид Монгол улс Тулгар Төрийн 2222 жилийн ойгоо тэмдэглэж байна.

Түүх соёл, баяр цэнгэлийн дээд болсон наадмынхаа босго өдөр Монгол улсын Ерөнхийлөгчийн тангарагыг хоёр дахь удаагаа өргөсөндөө баяртай байна. Хүүдээ итгэх адил надад итгэсэн ард түмэндээ их баярлалаа. Аав ээжийнхээ ачыг хариулахын төлөө хүү нь яаж зүтгэдэг түүн шиг ард түмнийхээ төлөө зүтгэнэ. Монгол түмний баяр цэнгэлийн дээд болсон наадам ийнхүү эхэлж буйг тунхаглан зарлаж байна.

Сайхан наадаарай.

Мөнх хөх тэнгэр минь
Монгол түмнийг минь үүрд ивээг хэмээн билэгдлээ.

Ийнхүү Дэлхийд ганц Монгол наадам эхэллээ.





Дэлхийд ганц, дэнж хотойтол наадах Монгол наадам.
Дээлээрээ гоёж, дэлхийг донстол баярлах Эрийн гурван баяр зөвхөн Монголынх.

Эрмэг хурдан хүлгээ харан хийморио сэргээж, эрхий мэргэн харваачдын цэцэн мэргэнийг гайхан шагширч, хүчит бөхийн барилдааныг үзэн бахархах Монголын наадам.

Ингээд Дэлхийн өнцөг булан бүрт амьдарч буй элэг нэгт Монголчууддаа нар асгарч хур тэгширсэн найр хөгжиж, хуур уянгалсан Монгол наадмаар Эр бяраараа эзэн нь байж, эрмэг хурдаараа эрэлхэг нь байж, эрхий мэргэнээрээ түрүүнд нь байж, дэлгэр зуны налгар талдаа дэнж хотойтол сайхан наадахын ерөөл тавъя.

Та бүхэн сайхан наадаарай.

Х.Алтанзагас, А.Сүрэн, А.Ариунболд