Хиймэл оюун ухаанаар бүтсэн моделийн зураг анх удаа нийтэлсэн  Vogue сэтгүүл олны эсэргүүцэлтэй тулгараад байна. Эхлээд харахад жинхэнэ модель гэж бодогдох ч хуудасны буланд "Моделийг хиймэл оюун ухаанаар бүтээв" гэсэн бичигтэй байх аж. 

Энэ нь Guess брэндийн сурталчилгааны нэг хэсэг байсан ба Seraphinne Vallora маркетингийн фирм хиймэл оюун ухаан ашиглан бүтээжээ.

Vogue сэтгүүлд AI модель нийтлэгдсэн нь редакцид хамааралгүй, энэ нь тэдний шийдвэр биш байсан гэж мэдэгджээ. Загварын салбарт хиймэл оюун ухаан ашиглах нь загвар өмсөгчдийг ажилгүй болгохын зэрэгцээ гоо сайхны бодит бус стандартыг өөгшүүлнэ гэж зарим шинжээчид үзэж байна.

Тухайн "модель" нь өөгүй төгс, бор болон шаргал үстэй ба брэндийн зуны коллекцийн судалтай макси даашинз, цэцгэн хээтэй хувцас өмссөнөөр Vogue сэтгүүлд дүрслэгдсэн байна.

Уг сурталчилгаа маргаан дагуулж, бодит загвар өмсөгчдийн олон жил тэмцэж ирсэн үр дүнд сөргөөр нөлөөлөх, мөн аль хэдийнээ хийсвэр гоо сайхны стандартад шаналж буй /ялангуяа залуу үеийн/ хэрэглэгчдэд хэрхэн нөлөөлөх талаарх олон асуултыг хөндөж байна.

"Guess" брэндийн уг маргаан дагуулсан сурталчилгааг бүтээсэн "Seraphinne Vallora" компанийг үндэслэгчид болох Валентина Гонзалес ба Андреа Петреску нар BBC-д ярилцлага өгөхдөө, Guess брэндийн үүсгэн байгуулагч Пол Марчиано инстаграмаар тэдэнтэй холбогдож, зуны сурталчилгаанд зориулж хиймэл оюуны загвар бүтээх хүсэлт тавьсан хэмээжээ.

“Бид түүний хүсэлтийн дагуу 10 загварыг анхны хувилбараар бүтээсэн. Тэрбээр бор болон шаргал үстэй хоёр эмэгтэйг сонгож, бид тэдгээрийг цааш хөгжүүлсэн" гэж Гонзалес тайлбарлажээ.

Тэрээр хиймэл оюунаар зураг бүтээх нь хялбар ажил гэж хүмүүс андуурдаг болохыг хэлээд, энэ нь үнэндээ нэлээн нарийн төвөгтэй ажил болохыг онцолжээ.

Тус компани 5 ажилтантай ба AI загвар бүтээх санаанаас эхлээд бэлэн бүтээгдэхүүн болгоход бүтэн сар шаардагддаг бөгөөд Guess зэрэг томоохон үйлчлүүлэгчдээс 100,000 ам.доллар хүрэх хөлс авдаг гэжээ.

Эх сурвалж: BBC