Сүхбаатар аймгийн Баруун-Урт сумын уяач Лхагвадоржийн Анхбаатарын халзан их нас түрүүлж, Ховд аймгийн Чандмань сумын уугуул, Манлай уяач Батчулууны Ерөөлтийн халтар морь аман хүзүүдлээ.

• Айргийн гуравт, Тод манлай уяач Мягмарсүрэнгийн Алтан-Очирын уясан Төв аймгийн Заамар сумын харьяат Алдарт уяач Чалхаагийн Уламбаярын хээр
• Айргийн дөрөвт, Алдарт уяач Адуучийн Нямбаатар уясан Говь-Алтай аймгийн Халиун сумын харьяат Алдарт уяач Чинзоригийн халтар
• Айргийн тавд, Тод манлай уяач Түмэндэлгэрийн Ихбаярын уясан Баянхонгор аймгийн Баян-Овоо сумын уяач Алдарт уяач Цэндийн Энхтайваны хул морь орж, уясан эзэн унасан хүүхэд, наадамчин олноо баярлууллаа. 

Тулгар төрийн 2234 жил, Их Монгол Улсын 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жил, Ардчилсан хувьсгалын 35 жилийн ой Үндэсний их баяр наадмын их насны морьд гарааны зурхай руу хөдөллөө.  

Их насны морьдын уралдаанд Өвөрхангай аймгийн Хужирт сумын уугуул,  Тод манлай уяач П.Батсайханы өнгөрсөн жилийн баяр наадамд айргийн гуравт хурдалсан буган халиун, Орхон аймгийн Баян-Өндөр сумын Алдарт уяач Ц.Эрдэнэбаярын бор халзан, Баянхонгор аймгийн Галуут сумын уугуул Аймгийн алдарт уяач Б.Золбоогийн хээр, Ховд аймгийн Чандмань сумын уугуул, Тод манлай уяач Б.Ерөөлтийн халтар зэрэг 161 хурдан хүлэг тоосоо өргөж байна.