УИХ-аар энэ долоо хоногт баяр наадамтай холбоотой хоёр хуулийн төсөл хэлэлцэнэ.

Нэг нь, УИХ-ын Б.Жаргалан, Д.Пүрэвдаваа, Ж.Золжаргал, Ш.Бямбасүрэн, Р.Батболд, С.Лүндэг, Ж.Алдаржавхлан нарын 40 гишүүний 2025 оны 6-р сарын 23-ны өдөр өргөн мэдүүлсэн Үндэсний их баяр наадмын тухай хуульд өөрчлөлт оруулах тухай хуулийн төслийн анхны хэлэлцүүлгийг хийнэ.



Үндэсний их баяр наадмын тухай хуулийн 5 дугаар зүйлийн 5.10 дахь хэсэгт “Их Монгол Улс байгуулагдсаны ой болон үндэсний тусгаар тогтнолоо сэргээн тогтоосон Ардын хувьсгалын ойн баяр наадмыг улсын баяр наадамтай хамтатган тэмдэглэнэ” гэснийг

“Тулгар төр байгуулагдсаны ой, Их Монгол Улс байгуулагдсаны ой болон үндэсний тусгаар тогтнолоо сэргээн тогтоосон Үндэсний эрх чөлөөний хувьсгалын ой, Ардын хувьсгалын ой, Ардчилсан хувьсгалын ойн баяр наадмыг улсын баяр наадамтай хамтатган тэмдэглэнэ” гэж өөрчлөн найруулахаар тусгасан байна.

Хууль санаачлагчид Монгол Улсын түүхэнд 200 гаруй жил үргэлжилсэн Манж Чин гүрний ноёрхлыг эцэс болгож, Монгол төрийг сэргээн мандуулсан 1911 оны Үндэсний эрх чөлөөний хувьсгалыг дурсвал зохих түүхэн үйл явдал мөн.

1990 оны ардчилсан хувьсгалын үр дүнд Монгол Улсад олон намын тогтолцоо үүсэж, өнөөгийн ардчилсан Үндсэн хууль батлагдсан бөгөөд иргэдийн эрх, эрх чөлөө, ил тод засаглалыг бататгахыг зорьсон тайван, хүчирхийллээс ангид эрс өөрчлөлтийн үйл ажиллагаа байсан гэдгийг тодотгон, уг хуульд өөрчлөлт оруулж, дээрх баяруудыг нэмж оруулах нь зүйтэй гэж үзжээ.

Хоёр дахь нь, УИХ-ын гишүүн Б.Уянга, О.Батнайрамдал нарын санаачлан 2025 оны 6-р сарын 27-ны өдөр өргөн мэдүүлсэн Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төслийг /хэлэлцэх эсэх/ хэлэлцэнэ.

Энэ хуулиар өмнө нь нийтээр тэмдэглэх баяр амралтын өдөр таарвал хэрхэхийг Засгийн газар шийдвэрлэхээр тусгасан байв. Ийм зохицуулалттай байх үед албан байгууллагууд Засгийн газрын шийдвэрийг хүлээдэг, урьдчилж ажлаа төлөвлөх боломжгүй байдаг. Тиймээс энэ төсөлд “Нийтээр тэмдэглэх баяр амралтын өдөр давхацвал амралтыг дараагийн ажлын өдөрт шилжүүлнэ” гэсэн ганц заалт оруулахаар тусгасан. Ингэснээр төр, хувийн хэвшлийн байгууллагууд ялгаваргүй хоногоор амрах болон ажлаа урьдчилж төлөвлөх боломж бүрдэнэ гэж УИХ-ын гишүүн Б.Уянга танилцуулав. 

УИХ-ын гишүүн Б.Уянга

Одоо хэрэгжиж буй Нийтээр тэмдэглэх баярын болон тэмдэглэлт өдрүүдийн тухай хууль болон Хөдөлмөрийн тухай хуульд “Үндэсний их баяр наадам, Ардын хувьсгалын ойн баяр: долоодугаар сарын 10, 11, 12, 13, 14, 15; “ гэж тус тус зааж, эдгээр өдрүүдэд нийтээр амрахаар хуульчилсан. 

Энэ жилийн тухайд  7 дугаар сарын 12, 13-ны өдөр нь амралтын өдөр тохиосонтой холбогдуулан 16, 17-ны өдөр нийтээр амрах зохицуулалт хийж, Үндэсний их баяр наадмаар 8 өдөр амрахаар боллоо. Хуульд "Ардын хувьсгалын ойн баяр: долоодугаар сарын 10, 11, 12, 13, 14, 15; “ гэж тус тус заасан байдаг тул дээрх шийдвэр төрийн байгууллагуудад хамаатай бөгөөд хувийн хэвшлийхнийг дагаж мөрдөхийг уриалсан юм. 


УИХ-аар гишүүн Б.Уянга, О.Батнайрамдал нарын өргөн мэдүүлсэн дээрх хуулийн төсөл батлагдвал энэ жилийн баяр наадмаар төр, хувийн хэвшилд ажилладаг иргэд 7-р сарын 10-17-ныг дуустал адилхан амрах эрх зүйн орчин бүрдэнэ. 

Нийтээр тэмдэглэх баярын болон тэмдэглэлт өдрүүдийн тухай хуулийн 4 дүгээр зүйлд: 

4.1.Нийтээр тэмдэглэх баярын өдөр гэж:

• Хуульд өөрөөр заагаагүй бол Үндэсний их баяр наадам, Ардын хувьсгалын ойн баяр: 7 дугаар сарын 10, 11, 12, 13, 14, 15
• Цагаан сар: билгийн тооллын хаврын тэргүүн сарын шинийн 1, 2, 3
• Шинэ жил: 1 дүгээр сарын 1
• Олон улсын эмэгтэйчүүдийн өдөр: 3 дугаар сарын 8
• Хүүхдийн баяр: 6 дугаар сарын 1
• Үндэсний эрх чөлөө, тусгаар тогтнолоо сэргээсний баярын өдөр: 12 дугаар сарын 29
• Их Эзэн Чингис хааны өдөр: Их Эзэн Чингис хаан мэндэлсэн билгийн тооллын өвлийн тэргүүн сарын шинийн 1
• Бүгд Найрамдах Улс тунхагласан өдөр: 11 дүгээр сарын 26
• Бурхан багшийн Их дүйчин өдөр: билгийн тооллын зуны тэргүүн сарын шинийн 15

Дээрх есөн баяраар бүх нийтээр амрах зохицуулалт нь уг хуулийн төсөлд мөн хамаарах юм.