Ерөнхийлөгч У.Хүрэлсүх Тулгар төрийн 2234, Их Монгол Улс байгуулагдсаны 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104, Ардчилсан хувьсгалын 35 жилийн ойг тохиолдуулан нэр бүхий эрхмүүдэд дипломат цол хүртээлээ.  

Гадаад харилцааны салбарт үр бүтээл, идэвх санаачилгатай ажиллаж, гадаад бодлогын зорилтуудыг хэрэгжүүлэхэд оруулсан хувь нэмрийг нь үнэлж

“Онц бөгөөд Бүрэн эрхт Элчин сайд” цолыг: 

1. Ахмад дипломатч Цэндийн Батбуян,
2. Ахмад дипломатч Чимэддоржийн Баттөмөр,
3. Ахмад дипломатч Эрдэнийн Бямбажав,
4. Монгол Улсаас ОХУ-д суугаа Онц бөгөөд Бүрэн эрхт Элчин сайд Өлзийсайханы Энхтүвшин,
5. Монгол Улсаас БНСВУ-д суугаа Онц бөгөөд Бүрэн эрхт Элчин сайд Жигжээгийн Сэрээжав,
6. Монгол Улсын Ерөнхийлөгчийн Гадаад бодлогын зөвлөх, Тэргүүн шадар дипломат Эрдэнэцогтын Одбаяр,
7. Монгол Улсаас НҮБ-ын дэргэд суугаа Байнгын төлөөлөгч Нямдоржийн Анхбаяр нарт олголоо. 

Мөн ахмад дипломатч Пүрэвжавын Гансүхэд “Онц бөгөөд Бүрэн эрхт Элчин” цолыг хүртээсэн байна. 

Ерөнхийлөгч цол гардуулах үеэрээ цаашид улс орныхоо язгуур эрх ашгийг хамгаалж, тусгаар тогтнолыг бататган бэхжүүлэх үйлсэд оруулсан хичээл зүтгэл, хуримтлуулсан туршлага, мэдлэгээ хойч үедээ өвлүүлж, төрийн алтан аргамжийн өвийг хадгалж явна гэдэгт итгэл төгс байгаагаа илэрхийлсэн гэж ЕТГ-аас мэдээллээ.