УИХ-ын чуулганы өчигдрийн /2025.06.17/ нэгдсэн хуралдаанд Ерөнхий сайд Г.Занданшатар танхимын шинэ сайд нараа танилцууллаа. Ерөнхий сайд танхимын сайд нараа танилцуулсны дараа гишүүд асуулт асууж хариулт авав.

Энэ үеэр УИХ-ын гишүүн С.Эрдэнэболд үгээ хэлээд, Нэг хүсэлт байна. Монгол Улс парламентын засаглалтай. Парламентын гишүүд ард түмнийг төлөөлдөг. Гэтэл Засгийн газрын гишүүд цул алтан тэмдэг зүүдэг. УИХ-ын гишүүд бол 350 мянган төгрөгийн үнэтэй мөнгөн тэмдэгтэй.

Энэ нь алт, мөнгөөр ялгаж, цаагуураа Засгийн газрын гишүүд илүү чухал юм байна гэсэн ойлголт төрүүлсэн шинжтэй. Энэ бол бэлгэдэл төдий зүйл биш. Харагдах байдал, илэрхийлэмж юм. Тийм учраас шинэ сайд нарт алт, үнэт металл биш энгийн энгэрийн тэмдэг зүүлгэх ёстой гэв.