Байгаль орчны олон талт гэрээ хэлэлцээр дундаас хамгийн амжилттай хэрэгжиж буй Озон задалдаг бодисын тухай Монреалийн протокол нь 1987 оны есдүгээр сарын 16-ны өдөр анх 24 орон гарын үсэг зурснаар хүчин төгөлдөр болж НҮБ-аас тухайн өдрийг Озоны давхаргыг хамгаалах олон улсын өдөр болгон тунхаглажээ.

2012 онд энэхүү өдрийг “Ирээдүй хойч үеийнхээ төлөө эх дэлхийнхээ агаар мандлаа хамгаалъя” уриан дор тэмдэглэн өнгөрүүлэх бөгөөд уг протокол батлагдсаны 25 жилийн ой тохиож байна.  

Манай улс дэлхийн дулааралд бага нөлөөтэй технологи нэвтрүүлснээр уур амьсгалын өөрчлөлтийг сааруулахад хувь нэмрээ оруулж хлорфтортнүүрстөрөгч бодисын импортыг 2010 онд бүрмөсөн зогсоожээ. Тиймээс НҮБ-аас Монгол улсын озоны давхаргыг хамгаалах үйлсэд оруулсан хувь нэмрийг үнэлсэн хүндэт шагналыг гардуулах юм байна.

Өнөөдөр 14.00 цагаас энэхүү ойн хүрээнд зориулсан нээлттэй арга хэмжээ Эрх чөлөөний талбайд болох бөгөөд БОНХ-ийн сайд С.Оюун, НҮБ-ын БОХ-ийн Озоны давхаргыг хамгаалах конвенцийн нарийн бичгийн дарга нарын газрын ахлах ажилтан Мэгүми Накамура, 2009 оны Монголын мисс Х.Бадамгэрэл нар оролцох ажээ.

Дашрамд дуулгахад дэлхий дахинд озон задалдаг бодисын үйлдвэрлэл бүр мөсөн зогсож, хэрэглээ 97,3 хувиар буураад байгаа юм.

Давхраат мандлын озоны давхарга нь нарнаас ирж байгаа хэт ягаан хортой В туяанаас хамгаалдаг дэлхийд байгалиас заяасан “бамбай” юм.  Эрдэмтэд 1970-аад оны дунд үеэс озон задалдаг хлорфторт нүүрстөрөгч /СFC/ хэмээх хөргөх бодис Антарктид дээрх озоны давхаргыг гэмтээж буйг судалж, тогтоогоод нийгэмд сэрэмжлүүлж эхэлсэн байна. 1970-1990 онд Антарктид дээрхи давхраат мандлын озоны агууламж 70 хүртэл хувиар багасаад байлаа. Энэхүү өргөн хүрээг хамарсан жирийн бус үзэгдлийг "озоны цоорхой" хэмээн нэрлэдэг бөгөөд 2006 оны байдлаар Антарктид дээрхи озоны цоорхой 29 сая ам км хүрээд байна.

Р.Сүрэн