Хүрлээ Бооёогоос нэг алхам илүү
Олон жилийн туршид өвөр түрийдээ орох шахам нөхөрлөж байсан Амбий, Бооёо, Хүрлээ гурав гэнэтхэн л тус тусдаа уран бүтээл хийх болсон. Тэд "Шинэ үе"-ийг байгуулж багагүй амжилтад хүрсэн ч гэдэс цадахын хэрээр өлсдөг гэгчээр орлого олох тусмаа мөнгөнөөс үүдсэн хэрүүл тэднийг тойроогүйгээс өрх тусгаарласан хэмээн олон хүн ярьцгаадаг. Олны үг ортой ч байж болох талтай. Анх Амбий продакшнаасаа гарч "Захиалгат инээд"-ийн залуустай нийлсэн бол араас нь Хүрлээ мөн л Бооёо найзаасаа нүүр буруулсан. Харин Хүрлээ зүгээр ч нэг гарсангүй харин ч Амбийтайгаа нийлэн "Комеди арт" хамтлаг байгуулж нэг их удаагүй ч хоёр дахь тоглолтоо хийж байна. Шинэхэн хамтлагийн ахлагч Хүрлээ телевизийн ертөнцөд хөл тавьж байгаа сурагтай. Тэрээр Комеди артын дэргэд "TV Art" продакшн байгуулж тун удахгүй телевизээр хошин нэвтрүүлгээ цацахаар бэлдэж байгаа гэнэ. Ингэснээрээ Хүрлээ Бооёогоосоо нэг алхам илүү гишгэх бололтой.

“Х ТҮЦ”-ийнхэн Ах намд гоморхов
Өнгөрсөн долоо хоногийн нэгдэхээс эхлэн олны анхаарлын төвд байсан МАХН-ын хурал цөөнгүй хүнийг гонсойлгосон бололтой. Гоморхсон хүмүүсийн нэг хэсэг нь “X ТҮЦ” хамтлагийнхан гэнэ. Соёлын төв өргөөнд хоёр өдөр бүр тавигдаж байсан “Хартай нөхрийн худалч эхнэр” хошин шоу тоглолт нь Ах намын хурлаас болж хэдэн өдөр тоглогдоогүй нь ийнхүү тэднийг “Ах” нартаа гомдоход хүргэсэн бололтой.