Хэрэв хүн төрөлхтөн цаг уурын өөрчлөлтийг зогсооход илүү их анхаарахгүй бол цагаан баавгай 21-р зууны сүүлээр устаж үгүй болж магадгүй. Хойд мөсөн далайн мөс хайлсаар байгаа учир тус бүс нутгийн цагаан баавгай аль хэдийн мөхөж эхлээд буй гэж эрдэмтэд анхааруулж байна.

Цагаан баавгай нь дэлхийн хамгийн том баавгай бөгөөд мөс тэдний ан хийх талбар юм. Харин дэлхийн дулаарлын улмаас Хойд мөсөн далай хайлж, цагаан баавгайнууд хоол олохоор урт замыг туулах болсон ба эрэг дагуу тэнүүчлэх нь элбэг болсон байна.

Торонтогийн их сургуулийн профессор Петер Молнар "Цагаан баавгай ирээдүйд цаг уурын өөрчлөлтийн тухай постер зураг болж үлдэх эрсдэлтэй байна. Хэрэв мөс үгүй бол тэдэнд очих газар үгүй" хэмээжээ.

Нийт 22-31 мянга орчим цагаан баавгай 19 бүс нутагт амьдардаг ба 60-80 гаруй хувь нь Канад улсад байдаг. 1973 оноос цагаан баавгайг хамгаалах, эко системийг нь алдагдуулахгүй байх талаар ярьж эхэлсэн. Учир нь хүн төрөлхтөн 1700-аад оноос эхлэн Европ, Орос, Хойд Америкт цагаан баавгайг их хэмжээгээр агнадаг байсан юм.

Цагаан баавгайн тухай сонирхолтой баримтуудаас:

• Тэд цагаан үстэй ч хар арьстай
• Цагаан баавгайн нийт ангийн 2 хувь нь л амжилттай болдог
• Эр баавгайн жин дундаж биетэй 10 хүнтэй тэнцдэг
• Тэд үргэлж 2 ихэр бамбарууш төрүүлдэг

Эх сурвалж: WWF.org, BBC