Олимпийн тамирчид одоо л хувцасныхаа төлөө санаа зовохоо болих нь. Түрүүчийн захиалга нь буцаж, хэнд хаана хандахаа мэдэхгүй багагүй будилж байж Японы “Аsics” фирмд сар хүрэхгүй хугацааны өмнө захиалга өгч байсан бол ирэх даваа гаригт буюу энэ сарын 9-нд эзэддээ очихоор болжээ.

Гэхдээ тамирчдад хувцсыг нь өгөхийн өмнө БТСГ-т хүлээлгэн өгөх юм байна. Хувцас хүлээж авах ажиллагаанд Шадар сайд М.Энхболд, МҮОХ-ны ерөнхийлөгч Д.Загдсүрэн зэрэг албаны хүмүүс оролцох юм байна.

Уг ёслолын дараа Лондон-2012 зуны олимпийн ХХХ наадамд оролцох Монголын баг тамирчдын хоёр дахь хэсгийг үдэх ёслолын ажиллагаа болох юм.

Лондонг зорих хоёр дахь хэсэгт буудлагын шигшээ багийн тамирчид багтаад байгаа бөгөөд тэд наадмын өдөр буюу 11-нд хилийн дээс алхах юм.