Нийгмийн хамгаалал хөдөлмөрийн яамнаас жил бүр уламжлал болгон зохион байгуулдаг “Хаврын хөдөлмөрийн яармаг” маргааш МҮЭСТО-д 10:00-17:00 цагийн хооронд явагдах гэж байна. Тус арга хэмжээг Хөдөлмөрийн төв бирж, Мэргэжлийн боловсрол, сургалтын газар болон Монголын Мянганы сорилтын сан хамтран зохион байгуулж байгаа ажээ.

“Хаврын хөдөлмөрийн яармаг”-ийг төрөөс хөдөлмөр эрхлэлтийн талаар авч хэрэгжүүлж буй арга хэмжээг түгээх, томоохон ажил олгогч байгууллагууд нээлттэй ажлын байраа зарлан, төрийн болон хувийн хэвшлийн ажил зуучлалын байгууллагууд иргэдийг хөдөлмөрийн зах зээлийн мэдээллийн нэгдсэн санд бүртгэх, МСҮТ-үүд ажиллагаагаа сурталчлах юм байна.

Мөн үүний зэрэгцээ ажлын байр бий болгох хөнгөлөлттэй зээлд хамрагдах тухай банк санхүүгийн байгууллагын зөвлөгөө, гадаадад ажиллах хүч илгээх талаар мэдээлэл хүргэх зэрэг үйл ажиллагаануудыг нэг цэгээс хүргэж, урлагийн арга хэмжээ, лекц, ажил хөдөлмөрт хэрхэн бэлтгэх тухай хүний нөөцийн ганцаарчилсан зөвлөгөө, мэдээлэл өгөх арга хэмжээнүүд зохион байгуулагдах гэнэ.

Түүнчлэн Хөдөлмөрийн зах зээлийн мэдээллийн систем, түүний портал сайт болох www.hzzm.mn –ийг олон нийтэд танилцуулах мэдээллүүд хийх ажээ.

Дашрамд дурьдахад өнөөдрийн байдлаар 50 мянга гаруй идэвхтэй ажил хайгч байгаа бол хөдөлмөр эрхлэлтийн бүртгэл мэдээллийн санд бүртгэлтэй байгаа 10400 гаруй ажлын байранд иргэдийг бүртгэн, ажилд санал болгон зуучлахаар бэлтгэж байгаа гэнэ. Мөн үүний зэрэгцээ тус яармагт томоохон ажил олгогчдоос төлөөлж 20 байгууллага оролцох бөгөөд нийт 2500 гаруй нээлттэй ажлын байр зарлаж байгаа аж.

Зохион байгуулагчид нь уг арга хэмжээнд МСҮТ төгсөгчид төдийгүй ажил хайж буй иргэд болон ажилтан хайж буй ажил олгогч бүрийг урьж байна гэлээ.

Оролцогч байгууллага

-Нийслэлийн хөдөлмөрийн газар
-Монголын ажил олгогч эздийн нэгдсэн холбоо -Монголын үйлдвэрчний эвлэлийн холбоо
-Хөдөлмөр, халамжийн үйлчилгээний хэлтсүүд-7
-Ажил олгогч байгууллагууд-21
-Мэргэжил сургалт үйлдвэрлэлийн төвүүд-11
-Жижиг дунд  зээлээр  ажлын  байр  нэмэгдүүлэх зээл  олгогч  банк,
санхүүгийн байгууллагууд-2 /Хадгаламж банк, Капитал банк/
-Хувийн зуучлалын хөдөлмөр эрхлэлтийн албад-11
-БНСУ-н хүний нөөц, хөгжлийн агентлагийн Монгол дахь төлөөлөгч-1
-Оюутны хөдөлмөрийн бирж-2

Иргэд сонирхсон мэдээллээ 1287, 70121285 утсаар авч болох юм байна.

А.Цацрал