УИХ-ын чуулганы өнөөдрийн хуралдаан үргэлжилж байна. Хуралдаанаар Цусны донорын тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ж.Чинбүрэн нарын 4 гишүүн 2025.03.31-ний өдөр өргөн мэдүүлсэн, хэлэлцэх эсэхийг хэлэлцэж байна.

УИХ-ын гишүүн У.Отгонбаяр "Цусны донорын тухай хуулийн төсөл болон хамт өргөн мэдүүлсэн хуулийн төслүүдийг хэлэлцэхийг дэмжиж байгаа. Хувь гишүүний хувьд үүнд талархалтай хандаж байна. Донорын тухай хууль маш чухал. Нийгэм хурдтай хөгжиж, эд эрхтэн шилжүүлэн суулгах мэс засал эрчимтэй хийгдэж байгаа энэ үед цусны асуудал маш чухал. Доноруудыг алдаршуулах, урамшуулахад онцгой анхаарах ёстой юм билээ. Тэгж байж хүмүүс цусаа өгнө, мэс заслууд амжилттай хэрэгжих боломж бололцоо бүрдэх юм.

Би тогтмол цусаа өгдөг. Цусаа өгсний дараа хүнсний зүйлээр иргэдийг урамшуулдаг. Үүгээр шим тэжээлээ олж авах боломжийг л бүрдүүлж байх шиг, ний, нуугүй хэлэхэд тэр нь хангалттай биш. Тэгэхээр цусаа өгч буй хүмүүсийг урамшуулах чиглэлд нэлээн ажиллах хэрэгтэй юм билээ. Тиймээс энэ хуулийн төслийг онцгойлон дэмжиж, санал, санаачилгатай ажиллахаа илэрхийлж байна” гэлээ.