Удирдлагын академийн захирал Д.Сүрэнчимэгийн үйл ажиллагаатай холбоотой Аудитын ерөнхий газрын дүгнэлтийн талаар тус сургуулийн Эдийн засаг санхүүгийн тэнхимийн ахлах багш Б.Ганзориг мэдээлэл өглөө.

Тэрээр MPA агентлагт өгсөн ярианыхаа үеэр "Би санхүүгийн салбарын хүн учраас ажиллаж буй байгууллагынхаа санхүүгийн мэдээллийг сонирхдог. Удидлагын академийн 2024 оны санхүүгийн тайланд хийсэн аудитын тайлангаар маш их зөрчил гарч ирж байгааг анхаарч, арга хэмжээ авах шаардлагатай гэж үзэн Монгол Улсын сайд, Засгийн газрын хэрэг эрхлэх газрын дарга Н.Учралд албан тоот хүргүүлсэн. 

Энэхүү албан тоотын агуулгад Удирдлагын академийн захирал Д.Сүрэнчимэг нь албан тушаалын байдлаа урвуулан ашиглаж эрүүгийн гэмт хэргийн шинжтэй үйлдэл удаа гаргасан гэдгийг бичсэн. Тухайлбал 2024 онд 2 тэрбум төгрөгийн худалдан авах ажиллагаатай холбоотой зөрчил илэрсэн. Жишээ нь 1.2 тэрбум төгрөгийн өртөг бүхий баримтат уран сайхны кино хийлгэхээр нээлттэй сонгон шалгаруулалт явуулалгүй шууд худалдан авалтын гэрээ байгуулсан. Энэ нь авлигын шинжтэй буюу бусдад давуу эрх олгох гэдгээр нь авч үзэж байна. 2 сая төгрөгөөс дотогш худалдан авалтыг шууд худалдан авалтаар хийж болдог.

Мөн Удирдлагын академийн 100 жилийн ойн баярыг тэмдэглэхтэй холбоотой Засгийн газрын хэрэг эрхлэх газраас 1.2 тэрбум төгрөгийн төсвийг тусгаж өгсөн байдаг. Гэвч энэхүү үйл ажиллагааг 2.2 орчим тэрбум төгрөгөөр зохион байгуулсан байгаа юм. Эдгээр мэдээллийг нь Үндэсний аудитын газрын тайлангаас харж нотолсон" гэв.

Одоогоор Удирдлагын академиас ямар нэг хариу өгөөгүй бөгөөд бид энэ талаар тодруулахаар Захиргааны албатай нь холбогдох гэсэн ч утсаа авсангүй.