ОХУ-ын ерөнхийлөгч Владимир Путин 18-30 насны 160 мянган залууг цэрэгт татах шийдвэр гаргалаа. Энэ нь 2011 оноос хойших хамгийн өндөр тоо юм. 

Энэ нь улсынхаа армийг өргөжүүлэх зорилтын хүрээнд хийгдэж буй алхам юм. Тодруулбал Путин өнгөрсөн онд армийн нийт бие бүрэлдэхүүнийг 2.39 саяд хүргэж үүнээс 1.5 саяыг нь идэвхтэй албан хаагч болгоно гэж мэдэгдсэн.  

Оросын Батлан хамгаалахын яамнаас мэдээлснээр шинээр татагдсан цэргүүдийг Украинд хийж буй Оросын "цэргийн тусгай ажиллагаанд" илгээхгүй гэв. 

ОХУ жил бүрийн хавар, намар цэрэг татдаг бөгөөд энэ хаврын цэрэг татлагын зорилтот тоо өнгөрсөн оны мөн үеийнхээс 10 мянгаар их байгаа юм. 

Мөн 2024 оноос эхлэн цэрэгт татагдах насны дээд хязгаар 27 байсныг 30 болгож нэмсэн. 

Орос, Украины талууд энх тайвныг тогтоохоор АНУ-тай яриа, хэлэлцээ хийж буй энэ үед Путин цэргийнхээ тоог нэмэгдүүлэх шийдвэр гаргав. 

Түүний хувьд гал зогсоох, энх тайван тогтоох хэлэлцээнд өөрийн зүгээс хэд хэдэн шаардлагыг тавиад буй. 

Эх сурвалж: ВВС