ЭХЯ: Эрчим хүчний салбар 2.3 их наяд төгрөгийн өртэй байна
“Монгол Улс 2025 он гэхэд тарифын шинэчлэл хийхгүй бол цахилгаан эрчим хүчний салбарт 825 тэрбум төгрөгийн санхүүгийн алдагдал хүлээхээр байна” гэж Дэлхийн банк мэдээллээ. Ингэснээр зардлаа нөхөх нөхцөл байдал улам дордож, тариф нь зардлынхаа 56 хувьд л хүрнэ гэдгийг тодотгож байна. 2023 оны байдлаар цахилгааны тариф зардлын дөнгөж 77 хувийг, ахуйн бус хэрэглэгчид зардлын 89 хувийг, ахуйн хэрэглээний хувьд зардлын дөнгөж 52 хувийг л хангажээ.

Цахилгаан, дулааны тариф нь зардлаа нөхөж хүрэлцэхгүй байгаа нь салбарыг бүхэлд нь санхүүгийн чадваргүй болгож байгааг Дэлхийн банк дурдсан байна.

Одоогийн байдлаар эрчим хүчний салбар 2.3 их наяд төгрөгийн өртэй байгааг салбарын сайд мэдээлж байсан юм. Эрчим хүчний Сайд Б.Чойжилсүрэн “Энэ оны 11 дүгээр сарын нэгнээс цахилгаан эрчим хүчний тарифыг нэмэгдүүлж чадвал цаашдаа шөнийн эрчим хүчний татааснаас бусад бүх татаасыг салбар өөрөө хариуцах боломжтой байгаа”-г тодотгож байна..

Мөн эрчим хүчний салбарт хөрөнгө оруулалт татаад, ашиг олох хэмжээнд хүргэж чадвал улсын төсөвт алданги үүсгэхгүй байх боломжтойг онцолсон юм.