Нийтээр тэмдэглэх баярын болон тэмдэглэлт өдрүүдийн тухай хуульд Бурхан багшийн Их дүйчин өдөр буюу билгийн тооллын зуны тэргүүн сарын шинийн 15-нд бүх нийтээр амарна гэж заасан.

Энэ жил зуны тэргүүн сарын шинийн 15-н зургаадугаар сарын 11-ний лхагва гарагт тохиож байна. Иймд бүх нийтээр амрах юм. 

Зуны тэргүүн сарын шинийн 15-нд Бурхан багшийн эхээс мэндэлсэн, төгс гэгээрсэн, нирваанд орсон гурван их үйл давхцан тохиодог бөгөөд уг өдрийг "Бурхан багшийн их дүйчэн" өдөр хэмээдэг.  



Энэ оны Бурхан багшийн их дүйчэн өдрийг хэрхэн өнгөрүүлэх вэ? гэсэн сүсэгтэн олны асуултад "Жавзандамба хутагт" төвийн багш, гавж Д.Нямсамбуу дараах зөвлөгөөг өгч байна.

Тэрбээр, Дүйчэн өдөр үйлдэж болох олон буян, дагаж мөрдөж болох олон зүйл байна. Надад хамгийн түрүүнд санаанд орж буй зүйл бол сүсэгтэн та дүйчэн өдрийн өглөөний нар мандахаас жаргах хүртэл бусдыг битгий гомдоогоорой. Аль болох өөрийнхөө сэтгэлийг анзаарч, ууртай холбоотой бүхий л төрлийн сэтгэл хөдлөл төрвөл даруйд нь таньж мэдэж зогсоогоорой. Уур бухимдлын эсрэг энэрэл нигүүслийг төрүүлээрэй. 

Бурхны шашинд уурыг нисванис болгоноос хамгийн их хор хөнөөлтэй гэдэг. Уур төрсөн даруйд өмнө нь хураасан олон буяныг шатаадаг гэж үздэг учир уурыг тухайлан анхаарч, хорих тэвчих, магадгүй нэг өдөр дотоод сэтгэлээ анзаараад үз.

Уурыг төрүүлэхгүйг хичээж бусдыг хүндэлье, бусдыг энэрэн нигүүлсье, бусдад амар амгаланг өгцгөөе. Энэ жилийн бурхан багшийн дүйчэн өдрийн уриа нь "Амарамгаланг хамтдаа түгээе".