Монголчуудын өргөн дэлгэр тэмдэглэдэг баярын нэг бол яах аргагүй хүүхдийн баяр. Тиймээс ч өнөөдөр хүмүүс үр хүүхэд, багачуудаа баярлуулахыг эрмэлзэн хүүхдийн парк, Сүхбаатарын талбайг зорьдог. Энэ жил мөн дүүрэг бүр тус тусдаа хүүхдийн баярыг тэмдэглэж байна.

Манай сурвалжлах хэсэг Үндэсний соёл амралтын хүрээлэн буюу Хүүхдийн паркийг зорин сурвалжлага бэлтгэсэн юм. Энэ жилийн хүүхдийн баяр парк ашиглалтанд орсон учир олон эцэг, эх хүүхдүүдээ илүү гоё баярлуулах боломжтой болсон.

Биднийг өнөөдөр 12.00 цагийн үед парк дээр очиход тоглоомуудад дараалах хүний тоо тийм ч их байгаагүй юм. Өөрөөр хэлбэл, парк сэлүүхэн байсан гэж хэлж болно. Харин үүнээс хойш цаг орчмын дараагаар хүмүүсийн хөдөлгөөн нэлээд нэмэгдсэн юм.

Паркийн талбайн хэмжээ нэлээд багассан ч олон жил паркгүй байсан хүүхдүүдийн хувьд бөөн баяр билээ. Мөн анх удаа парк үзэж байгаа хүүхдийн хувьд үлгэрийн мэт санагдах нь лавтай. Тэр нь хүүхэд бүрийн гэрэлтсэн нүд, аз жаргалтай инээдээс илхэн байсан юм.

Паркийн хувьд одоогоор үндсэн тоглоомуудаас гадна автомат тоглоомуудтай нийлээд 20 орчим тоглоом ажиллаж байна. Үндсэн тоглоомуудын үнийн хувьд, 4000 -5000 төгрөгний үнэтэй байгаа юм. Эцэг, эхчүүдийн хувьд энэ нь үнэтэй тусах учир паркийн зүгээс багцын үнүүдийг санал болгож байгаа юм байна. Тухайлбал, дурын хоёр тоглоом 7000, дурын таван тоглоом 15 мянга, дурын найман тоглоом 20 мянган төгрөгний үнэтэй байна.

Та бүхэнд тоглоомын үнүүдээс сонирхуулвал:



Хүүхдүүдэд тоглоомноос гадна хүүхэлдэй, киноны баатруудтай хамт зураг даруулах боломжийг паркийн зүгээс гаргаж өгсөн байлаа. Паркад ороход тасалбарын үнэ нь 1000 төгрөг байсан бөгөөд үүндээ нэг зайрмаг үнэгүй дагалдуулж байсан нь багачуудад бас л нэг бэлэг байв.

Алсыг харагч, агаарын дугуй, галзуу хулгана, мангасын ам гээд хүүхдийн мөрөөдөл биелэсэн инээд цалгисан сайхан баяр болж байна.

Та манай холбоотой мэдээнээс паркийн фото сурвалжлагыг үзэх боломжтой. Мөн паркийн видео сурвалжлагыг ч холбоотой мэдээнээс үзнэ үү.

Ч.Болортуяа, А.Ариунболд