ЖАЙКА /JICA/ байгууллагаас ЦХИХХЯ, Мэдээллийн технологийн парктай хамтарч “Мэдээлэл харилцаа холбоо, технологийн салбарын эко системийг бий болгох, мэдээлэл цуглуулах суурь судалгааны төсөл”-ийг 2022 оноос хэрэгжиж байна.

Төсөл 2025 оны 4-р сар хүртэл үргэлжлэх бөгөөд төслийн хүрээнд хэрэгжиж буй таван хөтөлбөрийн нэг нь MonJа. MonJа хурдасгуур хөтөлбөрийг ЖАЙКА байгууллага “Мобиком”  корпорацитай хамтран хэрэгжүүлж буй юм. MonJa хөтөлбөрийн дөрөв дэх удаагийн Demo Day-г 2024 оны 11-р сарын 29-ний өдөр зохион байгуулж, төслийн дэмжлэг аваад ажиллаж буй “Smart Contract”, “System Engineering Mongolia” (SEM), “Mazaal AI” багийнхан ажлынхаа үр дүн, ололт амжилтуудаа төсөл хэрэгжүүлэгчдэд танилцууллаа.  



Энэхүү арга хэмжээнд 50 гаруй зочид төлөөлөгчид харилцаа холбоо, мэдээллийн технологийн салбарын  манлайлагчид, хөрөнгө оруулагчид, стартап сонирхогчид оролцлоо.

МИЯАГИ КЭНСҮГЭ: МОНГОЛ УЛС МЭДЭЭЛЭЛ ХАРИЛЦАА, ТЕХНОЛОГИЙН САЛБАРТ ИЛҮҮ ӨНДӨР ПОТЕНЦИАЛТАЙ

ЖАЙКА-гийн Монгол дахь төлөөлөгчийн газрын дарга Мияаги Кэнсүгэ, Японы хамтын ажиллагааны нийгэмлэгээс Монгол Улсад үзүүлж буй дэмжлэгээ тэргүүлэх салбар чиглэлээр ангилж, төсөл хөтөлбөрүүдийг хэрэгжүүлдэг. Үүний нэг гол салбар нь аж үйлдвэрийн төрөлжилтийн салбар. Үүн дотроо Монгол Улсын хувьд мэдээлэл харилцаа, технологийн салбар болон гарааны бизнес илүү өндөр потенциалтай гэж харж байна. Энэ салбарын хөгжлийг дэмжихэд Японы болон бусад улсын ААН-үүдтэй холбоо тогтоох, хамтран ажиллах, хөрөнгө оруулалтын боломжийг бий болгох, гадаад зах зээлд гарахад JICA-гаас дэмжлэг үзүүлэн ажиллаж байна.

“Мэдээлэл харилцаа холбоо, технологийн салбарын эко системийг бий болгох , мэдээлэл цуглуулах суурь судалгааны төсөл”-ийн хүрээнд хэрэгжүүлж буй MonJa хөтөлбөрт сонгогдсон гурван компани төслөө танилцууллаа. Үүгээр MonJa хөтөлбөр дуусгавар болохгүй, үргэлжилнэ. Энэ гурван компани маань хөтөлбөрт хамрагдах хугацаандаа олж авсан мэдлэг, технологийн ур чадвараа хөгжүүлж, Япон, Монгол Улсын бизнесийн түншүүдээрээ хязгаарлагдахгүй бизнес, харилцаа холбоогоо тэлээсэй гэж хүсэж байна. Тэр амжилтын эхлэл нь энэ хөтөлбөр байгаасай гэж хүсэж байна.

-MonJa нь ЖАЙКА-гаас хэрэгжүүлдэг бусад төслүүдээс ямар онцлогтой вэ?
-ЖАЙКА-гаас хүний нөөцийн хөгжлийг дэмжих, технологийн нөү хау-г дамжуулах, суурь дэд бүтцийг бий болгох, хөрөнгө оруулалт хийх зэрэг төслүүд хэрэгжүүлдгийг та бүхэн сайн мэдэх биз ээ. Харин энэ хөтөлбөрийн онцлог нь дээрх уламжлалт хэлбэрүүдээс гадна Япон, Монголын хувийн хэвшлийн байгууллагууд, төр засгийн байгууллагууд зэрэг олон талын оролцоог хангаж, хамтран бүтээмж бий болгох зорилготой. Бид бүхэн хамтарч мэдээлэл харилцаа холбоо, технологийн салбарын эко системийг бий болгох, мэдээлэл цуглуулах суурь судалгааны төслийн хүрээнд таван туршилтын хөтөлбөр хэрэгжүүлж буйн нэг нь MonJa.

Шалгарсан гурван компанидаа тодорхой дэмжлэг үзүүлж байна. Гэвч үүгээр зогсохгүй мэдээлэл, харилцаа холбооны салбарын хөгжлийн замын зураглалыг Монгол Улсын Засгийн газартай хамтран тодорхойлж, үргэлжлүүлж хамтран ажиллах зорилготой байна гэв.  

Б.ЭНХБОЛД: MONJA ХӨТӨЛБӨРТ ХАМРАГДАЖ, ЯПОНЫ ЗАХ ЗЭЭЛД ГАРАХ ЭХЛЭЛЭЭ ТАВЬСАНДАА БАЯРТАЙ БАЙНА



MonJa хөтөлбөрт хамрагдан хөгжүүлэлт хийж буй мэдээллийн технологийн “Mazaal AI” төслийг санаачлагч Б.Энхболд, MonJa хөтөлбөр Монгол Улсын стартапуудад хэрэгцээтэй бүх талын дэмжлэг үзүүлж, боломжоор хангадаг. Хамгийн сонирхолтой нь Япон улсын зах зээлд гарах боломжийг олгосон. MonJa хөтөлбөрөөрөө дамжуулан ЖАЙКА-гийн шугамаар бид Японы хамгийн том компанитай холбоо тогтоон, хамтын ажиллагааг эхлүүлсэндээ баяртай байна. Хэрэв бид өөрсдөө ажилласан бол тэр компаниудтай холбогдож чадахгүй байв.

-Танай багийнхан ямар төсөл хэрэгжүүлж байна вэ?
-Бид нар хиймэл оюун ухааны төсөл хэрэгжүүлж байна. Байнга давтагддаг, цаг их авдаг ажлыг хиймэл оюун ухаанаар орлуулж, хүний цаг хэмнэх, ажлыг хөнгөвчлөх зорилготой платформыг хөгжүүлж буй юм.  

Жишээ нь, Даатгалын компани маш их хэмжээний баримтан дээр ажилладаг. Тэр их баримтуудаас хэрэгтэй мэдээллээ олж авахын тулд их цаг зарцуулдаг. Нэг материал олох гэж 25 минут зарцуулдаг байсан бол AI-г ашигласнаар 15-хан секунд зарцуулах боломж үүсэх жишээтэй. Манай багийнхан энэ санаагаар төсөл бичээд, шалгарсан.

Бид цөөхүүлээ. Манай багийнхан 2023 оны нэгдүгээр сард ажлаа эхэлснээс хойш тасралтгүй ажиллаж байна гэлээ.