Монгол Улсын Үндэсний аюулгүй байдлын зөвлөлийн Ажлын албаны дарга Б.Хурцын давж заалдах шатны шүүх хурал Лондонгийн Курт оф Роял шүүх танхимд боллоо.

Шүүх хуралд манай талаас Б.Хурцын өмгөөлөгч Алан Жонс, Гадаад харилцааны яамны Төрийн нарийн бичгийн дарга Д.Цогтбаатар, Их Британи Умард Ирландын нэгдсэн вант улсад суугаа Элчин сайд Б.Алтангэрэл, консул Н.Батаа, Б.Хурцын эхнэр Ү.Сарнай болон хүү нь оролцсон байна.

Харин эсрэг талаас Их Британийн Прокурорын газрын төлөөлөгч А.Уоткинс, Гадаад харилцааны яамны хамтын ажиллагааны асуудал эрхэлсэн газрын зөвлөх С.Доббин болон бусад албаныхан оролцжээ.

Энэ удаагийн давж заалдах шатны шүүх хурлаар Б.Хурцыг эх оронд нь шилжүүлэх асуудлыг хэлэлцсэн байна. Гэвч Лондонгийн шүүх Английн талын хүсэлтийг хүлээн авч, хэргийн нэмэлт баримтуудыг хэлэлцэхээр болжээ. Шүүхийн шийдвэрийн дагуу ирэх сарын 6-нд Б.Хурцын хэргийн нэмэлт баримт Лондонгийн шүүхэд ирэх бөгөөд мөн сарын 21-нд шүүх хурал үргэлжлэхээр товлогджээ.

Үндэсний аюулгүй байдлын зөвлөлийн Ажлын албаны даргын хэрэг нэлээд сунжирч байгаа аж. Учир нь Их Британи Умард Ирландын нэгдсэн вант улсын Үндсэн хуулиар аливаа хэрэг 21 хоногийн дотор шийдвэрлэгддэг байна. Гэвч Б.Хурцыг баривчлаад найман cap, анхан шатны шүүхийн шийдвэр гараад 88 хоножээ.

"Инфитлав" сайтад өгүүлснээр Англитай холбоотой бусад улсын дипломат албаны төлөөлөгчийн хэрэг нэлээд сунжирдаг. Дийлэнх тохиолдолд Английн тал шүүх хуралд ялалт байгуулдаг. Өөрөөр хэлбэл, Б.Хурц ойрын хугацаанд эх орондоо ирэхгүй бололтой.

Д.Түвшинтөр http://niigmiintoli.mn/