Дэлхийн алдартай загвар зохион бүтээгч Пьер Кардин өөрийн “Pierre Cardin” фирмээ зарах гэж байна. Өдгөө 88 настай Францийн алдарт загвар зохион бүтээгч  “Волл стрит журнал” сонингийн сурвалжлагчтай ярилцаж байхдаа “хэдэн жилийн дараа би байхгүй болно. Харин тэр үед хэн нэгэн миний ажлыг үргэлжлүүлэх ёстой шүү дээ” гэжээ.

Тэрээр тооцоолохдоо фирм нь одоогоор нэг тэрбум еврод хүрнэ гэсэн бол зарим мэргэжилтнүүд үүнийг хоёр дахин ихэсгэсэн тоо гэж үзэж байгаа аж.

“Pierre Cardin” загварын ордон нь энэ салбартаа Азийн улс орнуудтай түншийн харьцаа тогтоосон анхны газруудын нэг бөгөөд Кардин брэнд дэлхий даяар маш алдартай юм.

Пьер Кардин өөрийн фирмээ 1950 онд  үүсгэн байгуулсан ба хувцасны авангард хэв маягаар маш хурдан алдарт хүрсэн юм.

Японд 1957 онд, Хятадад 1979 онд загварын ордны салбарууд байгуулагдаж байжээ. Азийн улс орнуудын хэрэглэгчид одоо ч гэсэн бүтээгдэхүүнийг нь маш их захиалдаг аж.

Кардин өөрийн брэндийн нэрийг лицензжүүлсэн анхны хүмүүсийн нэг бөгөөд одоогоор ийм нэртэй цамц, цэвэр ус, тавилга, үнэртэй ус зэрэг маш олон нэр төрлийн бараа бүтээгдэхүүн байгаа аж.

Дэлхий даяар сая сая ийм лицензээс олж байгаа орлогын хэмжээг үнэлэхэд тун хэцүү байгаа юм байна.

Одоогоор Америкийн Айконикс брэнд түүний фирмийг сонирхож байгаа аж. Пьер Кардин компаниа зарах ямар ч нөхцөлд зохион бүтээх ажлаа удирдан явуулсан хэвээр байна гэжээ.

С.Халиун

Эх сурвалж: www.bbc.com