“Оюутолгой” компанийн ханган нийлүүлэгчдийн форум өчигдөр болов. Үүнд 600 орчим компанийн 1000-аад төлөөлөл оролцлоо. Тэд удахгүй эхлэх далд уурхайн бүтээн байгуулалтад оролцох хүсэлтэй байна.

Форумд Хөрөнгө оруулалтын газар, Австралийн Ерөнхий консулын газар, Бүгд найрамдах Чех улс, Канад, БНСУ-ын болон Британийн ЭСЯ, Олон улсын санхүүгийн корпораци, Монголын бизнесийн зөвлөл, Монгол дахь Америкийн худалдааны танхимын төлөөлөгчид ч оролцлоо.

Далд уурхайн ажил эхлэхтэй зэрэгцэн хэдэн монгол хүнийг ажлын байраар хангах, хэчнээн монгол компаниас бараа бүтээгдэхүүнээ худалдан авах вэ гэдгийг сэтгүүлчид юун түрүүнд компанийн удирдлагуудаас лавласан юм.

Энэ оны гуравдугаар улирлын байдлаар тус компани 885 ханган нийлүүлэгчтэй хамтран ажиллажээ. Эдгээрийн 576 нь үндэсний компани юм байна. Үйл ажиллагааны худалдан авалтын зардлын 52 хувийг дотоод компаниуд эзэлж байгаа аж.

Өнгөрсөн есдүгээр сард л гэхэд “Оюутолгой” компани нийтдээ 200 орчим сая ам.долларын худалдан авалт хийжээ.

Он гарснаас хойш тус компанийн худалдан авалт тогтмол өссөнийг графикаас харж болно.    

Харин далд уурхайн бүтээн байгуулалт эхлэхэд нийт ажлын 80 хувийг Монголчууд гүйцэтгэнэ гэж Эндрью Вүүдлэй захирал онцлов. Тэгвэл ямар чиглэлээр үйл ажиллагаа явуулдаг компаниудтай ханган нийлүүлэгчийн гэрээ хийхийг танилцуулъя.

• Уурхайн үйлчилгээ
• Далд уурхайн хоргодох байр
• Далд уурхайн тулгуур бэхэлгээний материал
• Өрөмдлөг, өрөмдлөгийн тоног төхөөрөмж, хэрэгсэл
• Боловсруулалт болон материалын дэд бүтэц
• Хоолой, шахуурга
• Түлшний систем
• Хөдөлгөөнт тоног төхөөрөмж, дагалдах үйлчилгээ
• Мэргэжлийн үйлчилгээ
• Агааржуулалтын тоног төхөөрөмж, дагалдах үйлчилгээ
• Мателл хийц, төмөр
• Үйлдвэрлэлийн болон иргэний барилга байгууламж
• Тээвэр зууч, ложистик
• Галын аюулаас сэргийлэх үйлчилгээ, тоног төхөөрөмж
• Цахилгааны болон харилцаа, холбооны хэрэгсэл  

Эдгээр салбарт үйл ажиллагаа явуулдаг олон компани бий. Тэгэхээр тэднийг сонгон шалгаруулахдаа "Оюутолгой" компани дараах зарчмыг баримтална гэж Далд уурхайн төслийн хангамжийн менежер Эндрью Арнет танилцуулсан.

"Оюутолгой"-д ажилладаг, хамтран ажилладаг хүн бүр ёс зүйтэй байх үүрэг хүлээх гэнэ. Гэхдээ бид ёс зүйтэй гэж амлах нь хангалтгүй. Үүнийгээ үйлдлээр илэрхийлэх ёстой юм байна.

Дараагийн шаардлага нь ашиг сонирхлын зөрчлөөс сэргийлэх аж. Хэрэв та "Оюутолгой"-д ханган нийлүүлэгчээр ажиллах хүсэлтэй бол таны хувийн ашиг сонирхол "Оюутолгой"-н өмнө хүлээсэн үүрэгтэй зөрчилдөх ёсгүй гэнэ.

Тус компани авлигыг тэвчихгүй  гэдгээ ч мэдэгдэв. Үүнд үйл явцыг түргэтгэх зорилгоор өгсөн урамшуулал, хээл хахууль ч багтах юм байна. Үүгээр зогсохгүй тус компани ч улс төрийн нам, улс төрчдөд төлбөр төлөхгүй гэж шийдвэрлэжээ.  

Гэрэл зургийг Д.Жавхлантөгс