АНУ-ын долоон мужид торнадо салхи гарч их хэмжээний хохирол учирлаа. Тус улсын өмнөд хэсэгт нас барагсдын тоо 45-д хүрээд байгаа бөгөөд Оклахома, Миссисипи, Арканзас, Алабама, Жоржиа, Виржиниа болон Хойд Каролина зэрэг мужид сүүлийн хорин жилд тохиолдож байгаагүй их хохирол учирлаа хэмээн тус улсын хэвлэл мэдээллийн хэрэгслүүдээр мэдээлж байна.

Тухайлбал, Хойд Каролина мужид 62 торнадо салхи бүртгэгдсэн бөгөөд мужийн амбан захирагч Беверли Пердью 1984 оноос хойш ийм олон тооны салхи дэгдэж байгаагүй гэж хэлжээ. Одоогоор тус мужид гамшгийн өндөржүүлсэн байдал зарлаад байгаа аж.

Хар салхи пүрэв гаригт Оклахома мужаас эхэлсэн бөгөөд гурав хоногийн турш 240 торнадо салхи бүртгэгдсэн хэмээн АНУ-ын Үндэсний цаг уурын албанаас мэдэгдэж байна.

Аврагчид алга болсон иргэдийг эрж сурвалжлах, гамшиг болсон дүүргүүдэд аврах ажиллагаа явуулж байгаа аж. Албаныхны мэдээлж буйгаар хохирогчдын тоо нэмэгдэх хандлагатай байгаа юм.

Тус мужуудад байшин нурж, мод үндсээрээ ховхорч, байшингийн дээвэр хууларч шидэгдэн орчныхоо эд зүйлсийг эвдэж сүйтгэсэн байна. BBC-ийн мэдээлж буйгаар зөвхөн Хойд Каролинад л гэхэд 200 мянган айл тог цахилгаангүй болжээ.

Хар салхины хөдөлгөөн Атлантын далайд хүрээд байна.

С.Халиун

Эх сурвалж: www.bbc.com