Амьдралын бас нэгэн зун. Бусдаасаа гойд ялгаагүй боловч бүхий л ургамал, амьтан дахин төрсөн мэт жавхааждаг учир зуны улирал шинэ бас сайхан байна. Ногоон тал дуниартаж, мал цадсан шинжтэй тоомжиргүй хэвтэх нь цаанаа л нэг амгалан байгааг илтгэнэ.

Хөдөө талд амьдарч буй хэн бүхний сэтгэл онцын цочмог хөдөлгөөнгүй цагийн байдлыг дагаад намдуу байх нь таатай. Айлууд зусландаа төдийлөн олноороо бууж амжаагүй байна. Харин зуны дунд cap аль хэдийнэ гарчихсаныг ч анзаарах сөхөөгүй их хотын амьдрал өрнөнө. Хижээл насныхны ярих нь зунаас зунд улирлын байдал сүрхий өөрчлөгдсөнийг дурсан халаглах нь хаа сайгүй сонсогдох юм.

Үнэндээ ганцхан тэд ч биш арваадхан жилийн өмнөх үеийнхний хүүхэд насны зун өөр байсан нь яахын аргагүй үнэн билээ. Бага нас, тэгээд зуны улирал юутай таатайг хүмүүс юу эс андах вэ. Хүүхдийн баярын өмнөх шөнө нойр бага зэрэг хулжина. Томчуудын бэлдсэн бэлэгний сураг, маргааш нар мандахад хүлээж буй тоглоомууд, зуны улирлын налгар өдөртэй давхцахаараа хүүхэд бүрийн нар гардаг шүү дээ.

Хэдийгээр хааяа нэг бороотой бүрхэг өдөр хүүхдийн баяр таардаг ч ихэвчлэн нарлаг байсныг санаж байна. Бас тэгээд дулаахан. Харин одоо байгалиа гомдоосныхоо шант амсаж зуны улирлын тэр сайхан өдрүүд жаахан хомсдсоныг анзаарч байна. Зун болдгоороо л болов. Гэвч улирлын өнгө солигдохыг даган өөрчлөгддөг байгалийн үзэгдэлүүд үргэлжилсэн ч ёстой л нөгөө зун шиг зун болох нь улам цөөрөөд байгаа бололтой.

Үдээс өмнөдөө намрын өдөр шиг хүйтэн салхи үлээж, хойш нь болохоор хаврын хахирган цаг шиг их шороон хуй дэгдэх юм. Уулсаа нүцгэлж, усаа ширгээсний хариуг байгаль эх ийнхүү өгч байгаа болов уу. Төв Азийн Монгол орны эрс тэс уур амьсгал, түүнийг дагасан байгалийн гайхалтай зохицол дэлхийн улсуудаас өвөрмөц бас содон. Байгалийн тэр хатуу зохицлыг даван туулах чадвартай төрдөг монгол хүн зун, намрын хэдэн сард цагийн зөөлөнтэй учирч байгальтай илүү ойр амьдрах зохилдлогоотой байтал сүүлийн жилүүдийн энэ эрс тэс цаг агаарын байдал бусдын төлөвлөгөөг өөрчлөх гээд байна.

Дэлхийн эко систем өөрчлөгдөж буйг хуурай уур амьсгалтай Монгол орны иргэд бид илүү ихээр мэдрэв. Үүнийг өмнөхөөсөө арайл өөрөөр байх болсон зуны өдрүүд гэрчилж байх шиг. Зургадугаар cap гарсан ч цаг агаар нэг л тогтох янзгүй байн байн солигдох нь биднийг байгалиа яг одооноос эхлэн хамгаалахгүй бол хожимдохыг сануулсан дохио байгаагч үгүйсгэх аргагүй юм.

Зун бид хоёрын тэр дурсамж сайхнаараа л байгаа. Харин зун шиг зунаараа байх дэлхийн ааш дэндүү хурдан өөрчлөгдөж байна. Зун хавар, намартай холилдон эрлийзжээд байгаа гэсэн, үг. Харамсалтай нь хүн бидний буруугаас болж...

Ө.Хүү