Монгол улс гол мөрөн, рашаанаа тоолж байна. Байгаль орчны сайдын тушаалаар явагддаг энэ ажил нь дөрвөн жилд нэг удаа тохиодог бөгөөд ирэх сарын 30-д тоолж дуусах юм байна.

Зургаан бүсэд зургаан комисс гарган ажлуулж байгаа бөгөөд одоогийн байдлаар ажил нь 40 хувьтай байгаа гэнэ. Тооллогын эцсийн дүн оны сүүлчээр гарах аж. Хамгийн сүүлийн тооллогыг 2003 онд явуулж байсан бөгөөд 5565 гол горхи, 9600 булаг шанд, 374 рашаантай гэсэн дүн гарч байжээ. Харин нийт 2937 нуур тойром, гол, рашаан ширгэсэн байна. Үүний шалтгаан  нь хүний  буруутай үйл ажиллагаанаас гадна дэлхийн дулааралтай ч бас холбоотой байдаг гэнэ.

2006 онд шинээр тоо бүртгэлийн журам батлагдсаны дагуу энэ жилээс эхлэн Үндэсний статистикийн газар, Рашаан судлалын төв, Хүнс хөдөө аж ахуйн яам зэрэг байгууллагуудтай хамтран ажиллаж байгаа аж.

Өчигдөрөөс эхлэн Нийслэлийн комиссынхон гол мөрнийхөө тооллогын ажилдаа орсон байна. Харин нийслэлийн хэмжээнд сүүлчийн тооллогоор 22 гол горхи, 22 булаг шанд, нэг рашаан мөн нэг нуур тойром ширгэсэн гэсэн дүн гарчээ.

А.Энхжаргал