Ханиад хүрч халуурч бүлээрч эхлэх үедээ бид олны хэрэглээ болсон Колдаур, Миксагрипп зэрэг эмийг эмийн сангаас худалдан авч эргэлзэх зүйлгүй л ууж орхидог.

Гэтэл “Өглөөний сонин”-ний өнөөдрийн дугаарт “Колдаур, Миксагрипп, Миксафлу, Эффект эмүүдийг хэрэглэхийг хоригложээ” гэсэн гарчигтай мэдээ нийтлэгджээ. Тус мэдээнд дээрх эмүүдийг дэлхийн нийтийн хэрэглээнээс аль хэдийнээ гарсан, тэр ч байтугай Дэлхийн эрүүл мэндийн байгууллагаас хэрэглэхийг хориглосоор байтал манай улс үүнийг хэрэгжүүлэхгүй явсаар байна гэжээ.

Тус мэдээлэл үнэн эсэхийг тодруулахаар Эрүүл мэндийн яам, Мэргэжлийн хяналтын газар болоод Эрүүл мэндийн газартай холбогдсон юм.

Эрүүл мэндийн яамны Эм, эмнэлгийн хэрэгслийн хэлтсээс “Дэлхийн эрүүл мэндийн байгууллагаас тийм мэдээлэл бидэнд ирээгүй” гэсэн бол Эрүүл мэндийн газрынхан “Дээрх эмүүд ЭМЯ-аас гаргасан нийтэд хэрэглэх боломжтой эмийн жагсаалтад бүртгэгдсэн бол ямар ч асуудалгүй. Харин хориглосон эсэх талаарх мэдээллийг бид аваагүй” гэлээ.

Дэлхийн хэрэглээнээс хасагдсан гэгдэх дээрх эмүүд нь манай улсын эмийн бүртгэлд бүртгэгдсэн байдаг юм байна.

Ямартай ч холбогдох байгууллагууд ийм байр суурьтай байна. Эдгээр эмийг дэлхийд нийтэд хориглосон ч бай, үгүй ч бай Эрүүл мэндийн салбар хийгээд зарим хэвлэл мэдээллийн хэрэгсэл аль аль талдаа хариуцлагатай хандаж, иргэдэд бодит мэдээллийг өгч, олон нийтийн оюун санааг үймүүлэхгүй байвал сайн сан. 

Г.Од