Батлан хамгаалах сайдын тушаалаар энэ жилээс эхлэн "Эх орны төлөө" батлан хамгаалахын дээд шагналыг олгож эхлэхээр болсон билээ. Тухайн шагналд энэ онд батлан хамгаалах салбарын харьяа 18 анги, байгууллагаас 24 иргэн, албан хаагчдын нэрийг дэвшүүлэн ирүүлснээс дөрвөн иргэн албан хаагчийг "Эх орны төлөө" шагналаар шагнасан юм.

Батлан хамгаалах салбарын бодлого, зорилго, зорилтыг бэхжүүлэн, хэрэгжүүлэхэд онцгой гавъяа байгуулсан хэмээн Монгол Улсын хөдөлмөрийн баатар, Ардын багш, гавъяат хуульч Б.Чимид, Төрийн хошой шагналт ардын жүжигчин, хөгжмийн зохиолч Н.Жанцанноров, Зэвсэгт хүчний 084 дүгээр ангийн салааны захирагчийн орлогч, бүлгийн дарга, дэслэгч Г.Аззаяа, Батлан хамгаалахын их сургуулийн Ахлагчийн сургуулийн дамжааны багш, ахлах ахлагч Ш.Самбуу-Ёндон нарт өнгөрч буй энэ оны батлан хамгаалах салбарын дээд шагнал болох "Эх орны төлөө" шагналыг хүртээв.

Гавъяат хуульч Б.Чимид багшийн сүүлийн хоёр жил Батлан хамгаалах сайдын дэргэдэх Иргэний зөвлөлийн гишүүний хувьд Батлан хамгаалах салбарын эрх зүйн орчинг боловсронгуй болгоход оруулсан хувь нэмрийг нь үнэлжээ.

Харин Ардын жүжигчин Н.Жанцанноров хүүхэд залуучууд болон иргэдийг цэрэг эх оронч үзлээр хүмүүжүүлэх, цэргийн албанд төлөвшүүлэхэд өөрийн мэдлэг, оюун ухаанаа зориулан олон ажил, арга хэмжээ зохион байгуулж байсныг нь батлан хамгаалах салбарынхан үнэллээ.

Түүнээс гадна 2004 онд Иракд байрлах олон улсын энхийг сахиулагчдын хамтарсан цэргийн баазад Монгол цэргүүд террорист ажиллагааг урьдчилан таслан зогсоож, Монголын болоод бусад орнуудын олон мянган цэргийн амь насыг аварсан талаар одоо ч ярьдаг. Тэгвэл энэ өндөр нэр хүндийн эзэд болсон дэслэгч Г.Аззаяа, ахлах ахлагч Ш.Самбуу-Ёндон нарт батлан хамгаалах салбар тэргүүн дээд шагналаа олгосон юм.

Дэслэгч Г.Аззаяагийн хувьд зөвхөн Иракд төдийгүй 2006 онд Сьерра-Леон улсад энхийг сахиулах ажиллагаанд амжилттай оролцсон, одоогийн эрхэлж буй ажилдаа амжилт гарган, ЗХЖШ-ын даргын нэрэмжит шалгалтад хариуцсан бүлэг нь “онц” үнэлгээ авсан амжилтаараа ч тодорсон байна.

Батлан хамгаалахын сайд Л.Болд энэхүү дээд шагналыг цом, энгэрийн тэмдэг, өргөмжлөл болон арван   сая төгрөгийн хамт гавъяат хуульч Б.Чимид, Ш.Самбуу-Ёндон нарт гардуулан өгсөн юм. Харин ардын жүжигчин Н.Жанцанноров гадаадад тоглолттой, дэслэгч Г.Аззаяа Афганистан улсад энхийг сахиулах ажиллагаанд оролцож байгаа тул энэ өдөр шагналаа өөрийн биеэр авч чадсангүй. Гэхдээ Батлан хамгаалахын сайд Л.Болд Афганистан улсад үүрэг гүйцэтгэж байгаа Г.Аззаяатай утсаар холбогдон "Эх орны төлөө" шагнал олгож байгаагаа дуулгасан юм.

Энэ үеэр Батлан хамгаалахын сайд Л.Болд "Энэ шагнал ямар хэмжээний гавъяат үйлсийг баталгаажуулан, мөнхжүүлж, алдаршуулах ёстой вэ гэдэг дээр тодорхой хэмжүүр жишиг тогтоож байгаа. Тиймдээ ч адил гавъяа байгуулсан хүмүүстээ эхний жилд аль аль шагналаа ихэрлүүлэн олгож байна" гэлээ.

Энэ үеэр гавъяат хуульч, ардын багш Б.Чимид болон ахлах ахлагч Ш.Самбуу-Ёндон нарын сэтгэгдлийг сонслоо.

Ш.Самбуу-Ёндон: Энэ манай багийнхны гавъяа
Өнөөдөр бидэнд ийм эрхэм хүндтэй шагнал гардуулж байгаад Батлан хамгаалахын сайд болон энд хүрэлцэн ирсэн генерал, офицеруудад талархсанаа илэрхийлье. Мөн намайг анх цэргийн сургуульд хөл тавин, орж байхад цэргийн амьдралд сурган хүмүүжүүлж өгсөн Батлан хамгаалах их сургуулийн эрдэмтэн багш нийт хамт олондоо баярлаж явдгаа хэлье.

Энэ гавъяаг Г.Аззаяа бид хоёр хоёулхнаа байгуулаагүй. Манай хоёрдугаар ээлжийн удирдлага, бидэнтэй хамт үүрэг гүйцэтгэж байсан нөхдийн маань гавъяа гэж би хувьдаа үнэлж байна. Тийм болохоор хамт үүрэг гүйцэтгэсэн багийн анд нөхдөдөө баярлаж явдаг.

Б.Чимид: Эх оронч бүх хүний шагналыг надаар төлөөлүүллээ
"57 жилийн өмнөх цэрэг, ахлах түрүүч, өнөөгийн Батлан хамгаалах сайдын дэргэдэх Иргэний зөвлөлийн гишүүн, хуульч багш надад Монгол Улсын Батлан хамгаалах яамны дээд "Эх орны төлөө" шагнал олгож байгаад сайд Л.Болд болон яамны төв аппаратын удирдах ажилтнууд, энд байгаа офицер, генералууд болон ахлах ахлагч Ш.Самбуу-Ёндон нарын гэр бүлийнхэнд их баярлаж байгаагаа илэрхийлье. Энэ шагналыг би өөртөө хамааруулахаас өмнө Монгол Улсын төлөө зүрх цохилж байдаг бүх иргэний, тэдний аль нэгэн хүнээр бэлэгдэх ёстой байдаг тэр шагналыг хүртлээ гэж ойлгож байна" гэсэн юм.

Мөн тэрээр "Энэ бол зөвхөн миний үг биш. Эх орон тусгаар тогтнол гэдэг бүх хүний бодож зүүдэлж явдаг зүйл. Би энд нэг ном авчирсан байгаа. Тус номондоо Ардын зохиолч Б.Лхагвасүрэнгийн бүтээлээс нь найман мөр будаа идсэн юм. Түүнээсээ та бүхэнтэй хуваалцъя" хэмээн ардын уран
Б.Лхагвасүрэнгийн "Хил дээр бичсэн шүлэг"-ээс нь уншсанаар үгээ төгсгөсөн юм.

Б.Энхжаргал