Архаг тамхичид л биеэ хордуулдаг гэж боддог хүн олон. Харин тамхины утаа сорох бүрт бие, эрхтний "хөдөлгүүр" саатдагийг АНУ-ын эрдэмтдээр ахлуулсан олон улсын судлаачид тогтоосон байна.

"Янжуур ганц сороход л ДНК-ийн бүтэц өөрчлөгдөх аюултай. Ийм хэлбэлзэл ойр ойрхон болбол хорт хавдар ч үүсч мэднэ" хэмээн судалгааны багийн ахлагч Режина Бенжамин анхааруулжээ.

Ширхэг янжуур 7000 гаруй химийн бодис агуулдаг бөгөөд хэдэн зуу нь эрүүл мэндэд халтай. Р.Бенжамины багийнхны тооцоогоор ердийн янжуурт байдаг бодисуудын багаар бодоход 70 гаруй нь хорт хавдар үүсгэгч хорт нөлөөтэй. Харамсалтай нь, тэр бүх хорт нөлөө хэдэн ч жил үл анзаарагдам байж мэднэ. Тиймээс л ихэнх хүн тамхийг аминаас холуур гэж боддог.

Судлаачдын тооцоогоор уушигны хорт хавдар, үрэвслийн 85 орчим хувь нь зөвхөн тамхинаас болдог аж.

Ер нь тамхины хорт нөлөө тухайн хүний биеийн онцлог, дархлаанаас шалтгаалан аль ч эрхтэнд хорт хавдар үүсгэж мэдэх гэнэ.

Г.Лхагва