Энэ оны 36 дахь долоо хоног буюу өнгөрсөн долоо хоногт Монголын хөрөнгийн биржийн арилжаа таван удаа явагдаж нийт 41 компанийн 696.17 мянган ширхэг үнэт цаас арилжигдаж 18.38  тэрбум төгрөгийн гүйлгээ хийгдлээ.

Нийт зах зээлийн үнэлгээ -8.90 тэрбум төгрөгөөр буурч 2,022.68 тэрбум төгрөгт хүрчээ.

Хувьцааны арилжаа
Тус долоо хоногт арилжигдсан 41 үнэт цааснаас 33 үнэт цаасны ханш өсч, 17 үнэт цаасны ханш буурсан ба есөн үнэт цаасны ханш тогтвортой байлаа.

Хамгийн өндөр хувиар ханш нь өссөн үнэт цаасанд  Тээвэр даррхан /51.52%/, Сөдөт /31.89%/, Тав /14.99%/, Бэрх уул /14.98%/, Чандмана тал /14.98%/ зэрэг ХК-иудын хувьцаа тооцогдож байгаа бол Монинжбар /-15.00%/, Хөх ган  /-12.31%/, Сүү /-10.26%/, Улсых их дэлгүүр /-7.00%/, Монголиа девелопмент ресорсес /-6.53%/ зэрэг ХК-иудын хувьцааны ханш хамгийн өндөр хувиар буурсан байна.


 
1-р график. 36 дахь долоо хоногт арилжаанд орсон үнэт цаас /тоо ширхэг/
2-р график. 36 дахь долоо хоногт арилжаанд орсон үнэт цаас /үнийн дүнгээр/

Ремикон, Женко тур бюро, Гермес, Хөх ган, Силикат ХК-иудын хувьцаа тоо ширхэгээр хамгийн идэвхтэй арилжигдсан бөгөөд нийт арилжигдсан тоо ширхэгийн 66.16 хувийг эзэлж байна.  

Хамгийн өндөр үнийн дүнтэй арилжигдсан хувьцаанд Багануур, Ремикон, АПУ, Шивээ овоо, Адуунчулуун зэрэг ХК-ийн хувьцаа тооцогдож байгаа бөгөөд нийт үнийн дүнгийн 1.05 хувьд нь арилжигдсан байна.

Бондын арилжаа
Он гарснаас хойш 173.10 тэрбум төгрөгийн Засгийн газрын бонд арилжигдаад байсан бөгөөд энэ 7 хоногт 18 тэрбум төгрөгийн 180,040 ширхэг бонд арилжигдсанаар нийт 191.10 тэрбум төгрөгийн засгийн газрын бондын арилжаа хийгдсэн байна.

2008 оноос хойш идэвхгүй байсан хөрөнгийн зах зээл идэвхжиж, хөрөнгө оруулагчид нэмэгдэхийн зэрэгцээ зах зээл дээр шинээр бүтээгдэхүүнүүд гарч эхэллээ. Үүний нэг нь сүүлийн хоёр жилд гараагүй байсан Компаний бонд юм. “Жаст Агро” ХХК нь мах бэлтгэлийн ажлыг санхүүжүүлэх зорилгоор нийт 30.00 тэрбум төгрөгийн санхүүжилтийг хөрөнгийн зах зээл дээрээ ММБ/Монгол мах бонд/ бондыг гарган татахаар шийдвэрлэсний дагуу Монголын Хөрөнгийн биржээр арилжаалагдаж байна. Нийт гурван удаагийн арилжаагаар 3.75 тэрбум төгрөгийг үнийн дүн бүхий 375,847 ширхэг ММБ бонд арилжигдсан байна.

Зах зээлийн Тор 30 ХК-уудаас бүрдсэн BDS index тус долоо хоногийн сүүлийн арилжааны өдөр 4,431.12 нэгжид хүрсэн нь  өмнөх долоо хоногийн мөн үеэс -31.50 нэгжээр буюу -0.71 хувиар буурсан үзүүлэлттэй байна. Индексийн сагсанд багтах Хөх ган, Сүү, Улсын их дэлгүүр, Монголиа девелопмент ресорсес гэх мэт 19 ХК-иудын хувьцаа буурсан нь голчлон нөлөөлжээ.

Зах зээл дээр шинэ гарсан ХК-иудаас бүрдсэн BDS IPO index 242.15 нэгжид хүрч өмнөх долоо хоногийн мөн үетэй харьцуулахад -1.36 нэгжээр буюу -0.56 хувиар буурсан үзүүлэлттэй байна. Индексийн сагсанд багтах Монинжбар, БиДиСек, Монголиа девелопмент ресорсес, Хөх ган ХК-иудын ханш буурч, бусад хувьцаануудын ханш тогтвортой байлаа.

Өнгөрсөн долоо хоногийн хамгийн өндөр үнийн дүнтэй  буюу 52.74 сая төгрөгөөр арилжигдсан нь  Багануур ХК-ийн хувьцаа байлаа. Тус компани нь он гарснаас хойш хамгийн доод ханш нь 10,000 төгрөг байсан бол хамгийн өндөртөө 41,780 төгрөгт хүрч байжээ. 2009 онд алдагдалтай ажиллаж байсан бол 2010 онд 8.09 тэрбум төгрөгийн цэвэр ашигтай ажиллажээ. Ингэснээр нэгж хувьцааны өгөөж нь 385.84 төгрөгт хүрсэн байна.

Тоо ширхэгээр хамгийн идэвхтэй Ремикон ХК-ийн хувьцаа арилжигдсан бөгөөд 303.704 ширхэгээр арилжигджээ. Ремикон ХК нь хувь нийлүүлэгчдийн ээлжит бус хурлаараа компанийн өрийг хувьцаагаар солин, нэмэлт хувьцаа гаргахаар шийдвэрлэсэн. Ремикон ХК нь анх 2008 онд 78,679,464 ширхэг энгийн хувьцааг зах зээл дээр гаргаж байсан бол тэр үеэс хойш хамгийн доод тал нь 39 төгрөг, хамгийн дээд тал 163 төгрөгт хүрч байсан бол өнөөдрийн хаалтын ханш нь 139 төгрөгтэй байна.

Ч.Туяа