“Хүлэгү” болон “Номадиа” пикчерсийн хамтын бүтээл “Бүтэн амьдрал” 24 ангит кино 2-р сарын 15-наас эхлэн “Боловсрол” телевизээр үзэгчдэд хүрэх гэж байна. Тус бүтээлийн ерөнхий найруулагчаар МУСТА Сувидын Баттулга ажиллажээ.  

Амьдралыг хайрлаж, алдаа оноог дэнслэх ухаан, бие биенээ хүндэтгэн энэрэх сэтгэл, хүн төрөлхтөнд оногдсон гайхамшигт хувь төөргийн тухай энгийн нэгэн бүсгүйн амьдралаар дамжуулан эргэцүүлж бодох боломжийг “Бүтэн амьдрал” олон ангит кино та бидэнд олгох аж. Киноны гол дүрийг “Х-ТҮЦ” продакшны жүжигчин З.Онон, “Мөрөөдлийн театр”-ын жүжигчин Г.Эрхэмбаяр, “Маск” продакшны жүжигчин Г.Золзаяа нар бүтээсэн бол бусад дүрд жүжигчин Ц.Төмөрхуяг, С.Өлзийхүү, Б.Навчаа, Ө.Мөнх-Эрдэнэ, Д.Бямбадорж, А.Алтанхуяг, Э.Пүрэвжаргал, Б.Отгонтуяа, загвар өмсөгч О.Билгүүн, С.Сарнай нар тогложээ.

Монголын телевиз, кино урлагийн зах зээлд гадаадын бүтээлүүд том байр суурь эзэлж байгаа нь нууц биш. Тэдгээр чанартай бүтээлээс олон жилийн турш суралцаж хөгжсөний дүнд өөрсдийн контентыг бүтээх нь тус салбарынхны зорилго бөгөөд үүний нэг илрэл нь “Бүтэн амьдрал” кино юм. Олон ангит бүтээл хийнэ гэдэг авьяас, ур чадвар, санхүүгийн нөөц бололцоог шавхдаг томоохон сорилт. Үүнийг давж ажилласан уран бүтээлчид зургаан сарын хөдөлмөрөө үзэгчдэдээ ийнхүү толилуулах гэж байна.

Тус бүтээлээр дамжуулан нийгмийн эмзэг сэдэв болоод буй гэр бүл салалтын тухай хөндөн, элэг бүтэн амьдралын төлөө хэн бүхэн хичээж амьдрах ёстойг уриална хэмээн кино багийнхан дурдаж байлаа.

“Бүтэн амьдрал” олон ангит киноны дууг гитарчин, ая зохиогч Д.Өлзий-Орших зохиосон бол дуучин Б.Маралжингоо дуулж үзэгчдэд сонордуулахад бэлэн болжээ.