Энэ онд НҮБ-аас Авлигын эсрэг конвенц батлагдсаны 20 жилийн ойг тохиолдуулан “Дэлхий нийтээрээ авлигын эсрэг нэгдье” уриалгыг дэвшүүлэн, тус конвенцид нэгдсэн улс орон бүр зорилтот үйл ажиллагаа хэрэгжүүлж байна.

Авлигатай тэмцэх газар нь авлигатай тэмцэх тусгайлсан чиг үүрэг бүхий байгууллагын хувьд Монгол Улсын Засгийн газраас 2023-2024 оныг "Авлигатай тэмцэх жил" болгон зарласныг сайшаан дэмжиж, олон нийтийг соён гэгээрүүлэх, авлигаас урьдчилан сэргийлэх чиг үүргийнхээ хүрээнд авлигын эсрэг НЭГДЬЕ үндэсний хэмжээний нөлөөллийн аяныг эхлүүлж байгаа бөгөөд аяны талаар тодрууллаа.

АТГ-ын Урьдчилан сэргийлэх, соён гэгээрүүлэх хэлтсийн ахлах ажилтан, ахлах комиссар Д.Цэнд-Аюуш "Орон даяар эхлүүлж байгаа бөгөөд иргэдэд авлигын талаарх ойлголтыг үнэн зөвөөр хүргэх, үүний хор хөнөөлийг таниулах зорилготой. Мөн иргэдэд авлига, ашиг сонирхлын зөрчлийн талаар мэдээллийг өгдөг байх, болохгүй зүйлийн хажуугаар дуугай өнгөрч болохгүй гэдгийг ойлгуулах нөлөөллийн аян. Нөлөөллийн аяны хүрээнд төрийн байгууллагаас гадна төрийн бус байгууллага, хувийн хэвшлийг татан оролцуулж байгаагаараа онцлог. Маргааш болох Хүүхдийн эрхийг хамгаалах өдрөөр эцэг эхчүүд хүүхдүүддээ авлигын талаар таниулах үлгэрлэх чиглэлд мөн зөвлөгөө мэдээллийг хүргэнэ" гэлээ. 

Уг аянаар дамжуулан хууль бус үйлдэлтэй үл эвлэрэх, авлигыг үл тэвчих үзэл, хандлагыг олон нийтийн дэмжлэг, оролцоотойгоор төлөвшүүлэх, хүнд суртал, чирэгдлийг арилгах, төрийн үйлчилгээний ил тод, нээлттэй байдлыг хангах, авлигын эрсдэлийг бууруулж, иргэдийг авлигын эсрэг шүгэл үлээхэд түлхэц үзүүлэх зорилготой.

Хөгжил дэвшил, сайн сайхан бүхний төлөө иргэн бүрийн оролцоо чухал бөгөөд өнөөдөр хийсэн зөв үйлдэл тань ирээдүйд ирэх мянга мянган боломжийн эхлэл гэдгийг АТГ-аас онцолж байна.