Умайн хүзүүний хавдар нь бэлгийн замаар халдварладаг хүний хөхөнцөр вирусээр (ХХВ) үүсгэгддэг.

ХХВ нь умайн хүзүүний эд эсүүдийг гэмтээж, эмх замбарааг үй ургалтад оруулан, хорт хавдар үүсгэдэг юм. Гэхдээ хорт хавдар болтлоо хавдрын урьдал үе шатуудыг дамждаг.

Арьснаас арьсанд халдварладаг энэ вирус нь халдвартай хүний бэлэг эрхтэнд хүрэхэд, өөрөөр хэлбэл, шодой, хуухнаг, хошного, үтрээ, бэлгийн уруулаар дамжин халдварлана. Мөн бэлэг эрхтнийг үнсэх, илэхэд халдварлана. ХХВ-ийн халдвар авсан хүнийг харахад таних боломжгүй байдаг. Мөн тухайн вирусын халдвар авсны дараа биед зовиур илэрдэггүй.

Умайн хүзүүний хавдраар хэн өвдөх эрсдэлтэй вэ

Бэлгийн харьцаанд орсон бүх эмэгтэйчүүд энэ вирусын халдвар авах магадлалтай бөгөөд өндөр эрсдлийн бүлэгт дараах эмэгтэйчүүдийг хамруулна.

• Эрт бэлгийн харьцаанд орсон
• Хэт залуу насанд хүүхэд төрүүлсэн
• Таваас олон хүүхэд төрүүлсэн
• Бэлгийн олон хавьтагчтай байх, эсвэл бэлгийн олон хавьтагч бүхий хүнтэй бэлгийн харьцаанд байх

 Хэн эсийн шинжилгээ өгөх вэ?

• Бэлгийн харьцаанд орсон 30, 33, 36, 39, 42, 45, 48, 51, 54, 57, 60 насны эмэгтэйчүүд гурван жил тутам эсийн шинжилгээ өгөх шаардлагатай

Ямар бичиг баримт бүрдүүлэх вэ?

• Иргэний үнэмлэх
• Эрүүл мэндийн даатгалын дэвтэр

Умайн хүзүүний хорт хавдрыг илрүүлэх аргууд

Хорт хавдар болохоос өмнөх үе шатыг урьдал үе шат гэнэ.

Өөрчлөгдөж буй эсүүдийг хавдрын урьдал болон хавдрын үед илрүүлдэг арга бол умайн хүзүүний эсийн шинжилгээ буюу ПАП тест юм.

Эсийн шинжилгээ гэдэг нь умайн хүзүүнээс наалдац авч, эсийг тусгай аргаар будаж, микроскопоор харж эсүүдийг шинжилж, дүгнэлт гаргадаг бөгөөд энэ нь өвдөлтгүй бөгөөд эмэгтэйчүүдийн үзлэг хийх явцад наалдац авдаг

Умайн хүзүүний хавдрын илрэх шинж тэмдгүүд:

Хавдрын урьдал болон эрт үеүдэд ямар нэгэн шинж тэмдэг илэрдэггүй. Иймд зөвхөн эсийн шинжилгээ танд тусална. Хорт хавдар үүсч даамжран, нэвчин ургаж, ойролцоох эрхтнүүддээ тархах үед л анхны шинж тэмдгүүд илэрдэг.

Энэ үед илрэх шинж тэмдгүүд нь:

• Үтрээнээс хэвийн бус ялгадас гарах
• Үтрээнээс сарын тэмдгийн бус, мөчлөггүй цус гарах
• Цэвэршсэн эмэгтэйн үтрээнээс цус гарах
• Бэлгийн харьцаанд ороход цус гарах, эсвэл өвдөх

Эсийн шинжилгээ өгөхийн өмнөх бэлтгэл:

Дараах бэлтгэл нь эсийн шинжилгээний хариу зөв гарахад нөлөөлнө.

• Сарын тэмдэг ирээгүй үедээ шинжилгээ өгөх
• Шинжилгээ өгөхөөс өмнөх 2 хоногт үтрээний угаалга хийгээгүй байх
• Хоёр хоногийн өмнөөс бэлгийн харьцаанд орохгүй байх
• Үтрээний тампон хоёр хоногийн өмнөөс хэрэглээгүй байх
• Үтрээний лаа, үтрээний тос, эм зэргийг хоёр хоногийн өмнөөс хэрэглээгүй байх