“Долоодугаар сарын 1”-ний гэх хэрэгт холбогдсон цагдаагийн экс дарга нарыг шүүх хурал ШШГЕГ-ын харьяа Цагдан хорих 461 дүгээр ангийн шүүх хурлын танхимд хаалттай болж байна.



Одоогийн байдлаар цагдан хорих төвийн гадаа цагдаагийн ар гэрийнхэн тайван жагсаал хийж байна.



Тэд шүүх хурлыг нээлттэй хийхийг шаардсан лоозонгуудыг барьсан байлаа. Харин энэ үеэр гадаа нь хэвлэл мэдээллийн хэрэгслүүдийн сэтгүүлч, операторууд ирсэн байсан боловч “оруулахгүй” хэмээн шалтгаан тайлбарлаагүй цагдаа нар зогсч байлаа.



Удалгүй хэвлэл мэдээллийн байгууллагуудаас "Eagle", "C1", МҮОНРТ-ийнхэнийг дотогш оруулсан. Харин бусад хэвлэл мэдээллийн байгууллагын сэтгүүлчдийг оруулахгүй байгаа учир хамгаалалтын цагдаа нарт оруулаач гэсэн шаардлагыг сэтгүүлчид болон жагсагчид тавьж байлаа.



Жагсагчид хэвлэл мэдээллийн тэгш эрхтэй байдлыг алдагдуулж байна гэдгийг хэлж, бүх сэтгүүлчдийг оруулахыг шаардсан. Тайван өрнөж байсан жагсаал энэ үйл явдлаас болж багагүй үймсэн. Гэвч одоо хүртэл сэтгүүлчдийг оруулахгүй байгаа бөгөөд шүүх хурлын талаарх мэдээллийг өгөх боломжгүй байна.

О.Ариунбилэг