Монгол Улсын хувийн хэвшлийн эмнэлэг болох "Мөнгөн гүүр" эмнэлэг болон Тайваний "Юань Рун" эмнэлгийн нэгдэл нь 2022 оны 2-р сарын 25-ны өдөр алсын зайнаас онлайн хэлбэрээр хамтран ажиллах санамж бичигт гарын үсэг зурлаа. Тайваний "Юань Рун" эмнэлгийн нэгдэл нь өнгөрсөн оны 8-р сарын 27-ны өдөр Монгол Улсын Налайх дүүргийн эмнэлэгтэй эгч дүү эмнэлгүүдийн харилцаа тогтоосон төдийгүй "Мөнгөн гүүр" эмнэлэг тус эмнэлгийн нэгдлийн Монгол Улс дахь 21 дэх түнш эмнэлэг болов.

"Мөнгөн гүүр" эмнэлэг нь 100 гаруй хэвтэн эмчлүүлэгчдийн ортой, Монгол Улсын 3 дахь томоохон хувийн эмнэлэг бөгөөд олон улсын стандартад нийцсэн Монголын цөөхөн эмнэлгүүдийн нэг билээ. Тус эмнэлэг нь Тайваньтай олон жил хамтран ажиллаж байгаа бөгөөд нэлээд олон эмнэлгийн тоног төхөөрөмжөө Тайваниас татан авсан болно. Тус эмнэлгийг төлөөлж санамж бичигт гарын үсэг зурсан Гүйцэтгэх захирал Ш.Энхцэцэг хэлсэн үгэндээ “Өнгөрсөн жилийн байдлаар 240 гаруй мянган өвчтөнд эмнэлгийн тусламж үйлчилгээ үзүүлсэн бөгөөд 24 цагийн турш эмнэлгийн яаралтай тусламж үйлчилгээ үзүүлдэг. Цаашид талуудын хамтын ажиллагааны үр дүнд Монгол Улсын эрүүл мэндийн үйлчилгээг шинэ шатанд гаргаж, илүү олон Монгол иргэдийг хилийн дээс алхалгүй, дотооддоо Тайваньд байдаг шиг өндөр чанартай эмнэлгийн тусламж авах боломжийг бүрдүүлнэ гэж найдаж байна.” хэмээв.  

"Тайваний Юань Рун" эмнэлгийн нэгдэл нь эмзэг бүлгийн хүмүүст эмнэлгийн тусламж үзүүлэхийг хичээн ажилладаг төдийгүй зүрх судас, цээжний мэс засал, мэдээ алдуулалт, ортипед, урологи, яаралтай тусламжийн үйлчилгээ зэрэг чиглэлээр ихээхэн ахиц дэвшил гаргасан. Тус эмнэлгийн гүйцэтгэх дэд захирал И Вэнь Гуо хэлэхдээ “Бид Мөнгөн гүүр эмнэлэгтэй туршлага, мэдлэг, технологи харилцан солилцохыг тэсэн ядан хүлээж байгаа бөгөөд ингэснээр хоёр эмнэлгийн адил анхаарал халамж тавьдаг үйлчлүүлэгчид хамгийн сайн чанартай тусламж үйлчилгээг авах боломжтой болно.” хэмээн онцлов.

Санамж бичигт гарын үсэг зурах ёслолд Тайваниас Монгол Улсад суугаа төлөөлөгч Грэйс Ж.Р.Лүө уригдан оролцож үг хэлэв. Тэрээр хэлэхдээ Тайвань Монголын талууд эрүүл мэндийн салбарт ойр нягт хамтран ажилладаг. Тайваньчууд Монгол Улсын нийт 1000 гаруй эмч, сувилагчдыг мэргэжил дээшлүүлэх сургалт, семинарт хамруулж, олон жилийн хугацаанд эмнэлгийн тоног төхөөрөмж хандивласаар ирсэн. Тайваньчуудын зүгээс  эмчилгээний туршлага, цар тахлын халдвараас урьдчилан сэргийлэх туршлагаа хуваалцсаар ирсэн. Хоёр эмнэлэг хамтран ажиллах түнш эмнэлгийн харилцаа тогтоосноор Тайвань Монголын эрүүл мэндийн салбар дахь харилцаа, хамтын ажиллагаа улам гүнзгийрнэ гэдэгт гүнээ итгэлтэй байна.” гэв.