Авлигатай тэмцэх газрын гомдол, санал хүлээн авах 110 тусгай дугаарт ирэх зарим ерөнхий боловсролын сургуулийн удирдах албан тушаалтан, багш нарын ёс зүйтэй холбоотой, ялгаварлан гадуурхах үйлдэл гаргаж буй тухай гомдол өмнөх жилүүдээс ихэссэн талаар дурдлаа. Тодруулбал, 2021 оны байдлаар 110 тусгай дугаарт 184 гомдол ирснээс 96 нь гэмт хэргийн шинжтэй байсан.

Авлигатай тэмцэх газар, БШУЯ, Боловсролын ерөнхий газар, Нийслэлийн боловсролын газар, Монголын боловсрол, шинжлэх ухааны үйлдвэрчний эвлэлийн холбоо, Боловсролын хамтын ажиллагааны нийгэмлэг хамтран зохиосон “Авлигаас ангид боловсрол, ёс зүй ба шударга байдал” хэлэлцүүлэг боллоо.

Авлигатай тэмцэх үндэсний хөтөлбөрийн “Шударга, хариуцлагатай, ил тод нийтийн албыг бэхжүүлэх, ёс зүйг дээшлүүлэх” зорилтын хүрээнд бүх шатны боловсролын байгууллагын удирдах албан тушаалтан, багш, ажилтнуудын харилцаа, хандлага, ёс зүйн дүрмийн хэрэгжилтийг сайжруулах, авлигын эсрэг мэдлэгийг дээшлүүлэх, хариуцлагын тогтолцоог бэхжүүлэхэд дэмжлэг үзүүлэх зорилготой.

АТГ-ын Урьдчилан сэргийлэх, соён гэгээрүүлэх хэлтсийн ахлах ажилтан, ахлах комиссар Д.Цэнд-Аюуш “Төрийн байгууллагын шударга байдлын үнэлгээ” гэдэг судалгааг хийдэг. 2021 оны энэ судалгаанд авлигад хамгийн их өртөж байгаа институтын жагсаалтад боловсролын салбар эхнээсээ долоод жагссан. Хууль бус төлбөр, хураамж авсан, сургалтын үйл ажиллагааны чанар, хүртээмж муу байх, албан хаагчдын харилцаа, ёс зүйн асуудлаар гомдол их ирдэг. Гэхдээ зөвхөн төрийн албаны хүмүүсийг буруутгаж болохгүй. Жишээ нь эцэг, эхчүүд өөрсдөө санаачлаад багш, удирдлагуудад бэлэг өгөх зэрэг үйлдэл гардаг. Тиймээс хууль, тогтоомжийн хэрэгжилтийг сайжруулах, нөгөө талаас хууль тогтоомжийг олон нийтэд таниулах хэрэгтэй. 

Удирдах болон санхүүгийн албан тушаалтнууд авлигын эсрэг хуульд хамаарагдаж, эрүүгийн хариуцлага хүлээх боломжтой. Харин багш, ажилтнууд буюу гүйцэтгэх түвшний албан хаагчдад ёс зүйн дүрэм дийлэнх тохиолдолд үйлчилдэг” гэлээ.

Боловсролын ерөнхий газрын дарга Т.Ням-Очир “Багш, удирдах ажилтан, боловсролын салбарын албан хаагчдын ёс зүйн дүрмийг 2018 онд батлан гаргасан. Үүнд таван чиглэлийн 20 гаруй хэм хэмжээг багтаадаг. Жишээ нь хүүхдэд бие махбодын шийтгэл оногдуулахгүй, хүүхдийн хувийн мэдээллийг задруулахгүй, бэлэг сэлт, мөнгөтэй холбоотой харилцаа үүсгэхгүй байх зэргээр нарийвчлан зааж өгсөн. Хууль эрх зүйн хүрээнд ингэж заасан учраас зөрчил гаргасан багшид ёс зүйн болон эрх зүйн хариуцлага хүлээлгэнэ. Ёс зүйн хариуцлагад хамт олноосоо уучлал гуйх, амлалт бичих, асуудлаа шийдэх төлөвлөгөө гаргах зэрэг багтдаг. Харин гэмт хэргийн шинжтэй байвал хууль, шүүхийн байгууллагаар шалгагдаж, эрх зүйн хариуцлага хүлээдэг” гэлээ.

БШУЯ-аас 2022 оныг “Боловсролын салбарын ёс зүйн жил” гэж зарласан. Үүний хүрээнд нийт 848 сургууль, цэцэрлэгийн ёс зүйн зөвлөлийг шинэчлэн байгуулж, идэвхтэй үйл ажиллагааг явуулжээ. Үүнээс өмнө байгууллагын ёс зүйн зөвлөл нэр төдий байсан нь ажиглагдсан талаар онцолсон юм.