Тэнгэр огторгуйд холоос гялалзан харагдах бүүдгэр улаан давжаа оддын тоог сансар судлалын эрдэмтэд бидний бодож байснаас их болохыг баталжээ. Улаан одой одод нарны гаригтай харьцуулахад өчүүхэн жижгээс гадна бүүдгэр гэрэлтэй учраас сансар судлаачдын нүдэнд төдийлөн өртөөгүй байжээ. Иймээс огторгуйн оддын хэдэн хувийг давжаа одод орлодгийг мэдэхэд бэрх байсан аж.

Эрдэмтэд Гавай дахь одон орон судлалын Кек төвийн багаж хэрэгслийн тусламжтайгаар биднээс 50-300 сая гэрлэн жилийн тэртээх огторгуйн заадаст орших улаан давжаа оддын мөрийг илрүүлжээ. Эл ул мөр нарны хэмжээний 10-20 хувьтай дүйцэхүйц давжаа одод бодож байснаас ч их болохыг баталж байгаа юм. Тус сансрыи судалгааны ажлыг удирдан явуулсан багийн ахлагч Йельскийн их сургуулийн одон оронч Питер ван Докум хэлэхдээ "Шинэ нээлт сансар огторгуй дахь давжаа одод болон бусад одны тоо хэмжээг гаргахад чухал үүрэг гүйцэтгэж байна" гэжээ.

Тус багийнхан өмнө нь тэнгэрийн заадаст сүүн замнаас 20 дахин их давжаа од байгааг олж мэджээ. Судалгааны багийн эрдэмтэн Чарли Конрой хэлэхдээ "Бид тэнгэрийн заадсуудыг огторгуйн сүүн замтай адил шинж чанартай мэтээр хүлээн авдаг байсан. Гэвч шинэ нээлтүүд тэнгэрийн заадас бүрт өөр өөр орчин оршин тогтнодгийг баталлаа. Тухайлбал, энэ удаагийн ажиглалтаар олон тооны улаан давжаа од, илүү бага хар нүх байгааг олж тогтоосон" хэмээн ярьсан байна.

Нээлтийн хүрээнд тэнгэрийн заадсын үүсэл болон сансар огторгуйн нууцыг нээх цонх нээгдэнэ. Мөн шинээр олдсон одод болон тэднийг тойрон эргэлдэх гаригийн тоо хэмжээг тогтооход тус болох аж. Энэ нь дэлхийгээс өөр амьдрах боломжтой гаригийг олж тогтооход чухал үүрэгтэй юм.