Цагдаагийн ерөнхий газраас “Телеграм” платформ ашиглан үйлдэгдэж буй залилах гэмт хэргээс урьдчилан сэргийлэх ажил, арга хэмжээг улсын хэмжээнд зохион байгуулахаар төлөвлөн ажиллаж байна. Энэ ажлын хүрээнд иргэд, олон нийтэд дээрх гэмт хэргийн нөхцөл байдал, урьдчилан сэргийлэх арга замын талаар мэдээлэл өглөө.

Телеграмаар үйлдэгдэж буй гэмт хэрэг дараах ангилалтай байна.

• Романс залилан
• Даалгавар өгөх
• Хуурамч зар
• Секс сүрдүүлэг
• CopyCat
• Pump and Dump

Манайд сүүлийн 4 сарын байдлаар 619 гэмт хэрэг бүртгэгдсэнээс 10,3 тэрбум төгрөгийн хохирол учирсан байна.  Үүнээс нийслэлд 457 хэрэг 6,8 тэрбум, орон нутагт 162 буюу 3,5 тэрбум төгрөгийн хохирол учраад байна.

Гурван хохирогч тутмын хоёр нь эмэгтэй, 415 хохирогч буюу 67 хувь нь эмэгтэй, насны хувьд 25-34 нас зонхилж байна. Хувийн хэвшилд ажилладаг хохирогч дийлэнх нь юм. Нэг хохирогч 39 удаагийн үйлдлээр буюу гүйлгээгээр гэмт хэрэгтний 8 төрлийн данс руу нийт 195,8 сая төгрөг шилжүүлж хохирчээ. Ингэхдээ хамгийн эхлээд тикток дээр даалгавар биелүүлж 9000₮-ийн урамшуулал авч залиланд өртөх алхмаа эхлүүлжээ.

Үүний цаана КК парк буюу олон улсын үндэстэн дамнасан гэмт хэргийн бүлэглэл үйлдэж байгааг тогтоожээ. Гэмт этгээдүүд дансаа ашиглуулж буй иргэдийн данс руу мөнгөн гүйлгээг 1-2 минутад шилжүүлэн дамжуулж, олон улсын бирж рүү болон бооцоот тоглоомын сайт руу шилжүүлдэг байна. КК парк бүлэглэл нь хүний наймаа, хар тамхины гэмт хэрэг, сүүлийн үед цахим гэмт хэрэг үйлдэх болжээ. Монгол улсын иргэд ч ажилладаг гэх мэдээлэл бий. Тэд хилийн зааг дахь хяналтгүй бүсэд байрладаг.

ТА ХЭРХЭН СЭРЭМЖЛЭХ ВЭ?

• Хуурамч мэдээллээр төөрөгдүүлж, телеграм группт элсүүлж залилдаг тул анхаарах
• Телеграм хаягаа устгах, privacy тохиргоо хийх
• Ямар ч тохиолдолд урьдчилгаа мөнгө шилжүүлэхгүй байх
• Ажилд орохын тулд хувийн батлан даалт өгөхгүй байх
• Мөнгө шилжүүлсэн бол дахин мөнгө шилжүүлэхгүй байх
• Интернет банк, цахим хэтэвчээ бусдад ашиглуулахгүй байх