УИХ-ын Ёс зүй, дэгийн байнгын хорооны хуралдаан боллоо. Хуралдаанаар  “Ерөнхий сайд, Засгийн газрын гишүүнээр томилогдсон Улсын Их Хурлын гишүүн чуулганы ажиллагаанд оролцох журам” батлах тухай ажлын хэсгийн танилцуулгыг мэдээлэв.  

Энэхүү журмын төсөл нь 3 хэсэг, 12 заалттай. Журмаар УИХ-ын гишүүн өвчтэй, чөлөөтэй, дотоод гадаадад томилолттойгоос бусад тохиолдолд нэгдсэн, байнгын, дэд болон түр хорооны хуралдаанд оролцох үүрэгтэй. Засгийн газрын гишүүн ажил ихтэй ч, чуулганы хуралдааныг хүндэтгэж ажлаа төлөвлөнө. Нэн шаардлагатай гэж үзвэл урьдчилан мэдэгдэж чөлөө авна гэдгийг журамд тусгайлан заажээ.

Мөн Засгийн газар асуудлыг хамтдаа хэлэлцэж байгаа учраас кабинет дотроо сайд нар мэтгэлцэж, өөр өөрийн байр суурийг илэрхийлж, эсрэг, сөрөг саналтай байсан ч хамтарсан, нэгдсэн дуу хоолойтой байх тухай Засгийн газрын тухай хуульд заасан бий. Тиймээс УИХ-ын чуулганаар Засгийн газраас өргөн барьсан аливаа хууль, бодлогод Засгийн газрын гишүүн ямар нэг байдлаар эсрэг санал илэрхийлэхгүй, асуулт асуухгүй гэдгийг журмаар зохицуулахаар тусгасан байна.

УИХ-ын гишүүн Б.Хэрлэн “Хуралдаа суугаагүй бол, асуулт асууж байхад суудлаасаа хариулаагүй, эсрэг байр суурь илэрхийлсэн бол хариуцлага тооцох асуудал яригдаж байна. Эдгээр алдаанууд хоорондоо ач холбогдлын хувьд ялгаа заагтай байх уу. Хэдэн удаа тасалбар ямар хариуцлага хүлээлгэх вэ. Эсрэг байр суурийг хэн бүртгэж, хэн энэ асуудлыг гарган тавьж хариуцлага тооцуулахаар асуудлыг цааш нь уламжлах вэ” гэж тодруулав.

Үүнд УИХ-ын гишүүн А.Ариунзаяа “Хариуцлага тооцох эрх бүхий субъект бол Ерөнхий сайд. Бидний хувьд үнэхээр давтамжтайгаар, Засгийн газрынхаа эсрэг байр суурийг тогтмол илэрхийлээд байгаа хүнийг Ёс зүй дэгийн байнгын хороогоор хэлэлцэж хариуцлага тооцох эсэх талаар санал хүргүүлэх хамтын шийдвэрийг гаргана.

Мөн УИХ-ын гишүүн нэг жилд ажлаа 5 хоног тасалсан бол хариуцлага тооцох талаар Ёс зүй дэгийн байнгын хороогоор авч хэлэлцэх заалтууд бий” хэмээн хариуллаа.