Өмнөд Солонгосын хамгийн анхны Ерөнхийлөгчөөр И Сингман 1948 онд сонгогдож байв. Үүнээс хойш өнөөдрийг хүртэлх хугацаанд нийт 20 удаа Ерөнхийлөгчөө сольж байсан улс юм.

БНСУ-ын Ерөнхийлөгч нарын улс төрийн замнал тийм ч дардан байдаггүйг олон түүх баталдаг. Хамгийн ойрын жишээ гэхэд одоогийн Ерөнхийлөгч Юн Сок Ёлийн бүрэн эрхийг түдгэлзүүлээд байна.

И Сингман. 1960 оны дөрөвдүгээр сарын 19-ний хувьсгалаар анхны Ерөнхийлөгч И Сингманыг огцруулав. Японы колоничлолын дараа Өмнөд Солонгос 1948 онд анхны сонгуулиа хийж, Үндсэн хуулиа баталсан.
Энэ үеэр анхны Ерөнхийлөгчөөр И Сингман тодорсон бөгөөд 1948-1960 оны хооронд 12 жил төрийн эрх барьсан юм. Түүнийг хууль бусаар төрийн эрх барьж байна хэмээн ард түмэн эсэргүүцсэн. Тэрээр БНСУ болон БНАСАУ-ын хоорондын “Солонгосын дайн”-ыг эхлүүлсэн. Мөн олон мянган хүнийг шүүхийн тогтоолгүйгээр хороосон хэрэгт буруутгагджээ.

Чун Ду Хван. 1987 онд тав дахь Ерөнхийлөгч зургаадугаар сард гарсан бослогын дараа суудлаасаа огцорсон. Энэ тэмцлийн үр дүнд ард иргэд нь Ерөнхийлөгчөө шууд сонгох боломжтой болсон. Энэ хөдөлгөөн БНСУ-ын ардчилалд маш том нөлөө үзүүлсэн гэдэг. Улмаар тус онд Ерөнхийлөгчийг ард иргэд нь сонгоод зогсохгүй, анх удаа эмэгтэй хүн нэр дэвшсэн сонгууль болж байв. 

1995 онд түүнийг Ерөнхийлөгч байх хугацаандаа авлига авсан, 1980 оны Гванжугийн тэмцэлд хийсэн үйлдэлтэй нь холбогдуулан хэрэг үүсгэж, цаазын ял оноосон.

Энэ үеэр зургаа дахь Ерөнхийлөгч Ну Тэ Үд мөн 22 жилийн хорих ял оноосон юм. Гэхдээ 1997 онд Ерөнхийлөгчийн өршөөлөөр Чун Ду Хваны цаазын ялыг бүх насаар нь хорих болгон өөрчилсөн.

Ну Мү Хёнь. 2003-2008 онд алба хашсан Ну Мү Хёнь Ерөнхийлөгчийг 2004 онд парламентын гишүүд огцруулахыг дэмжиж, бүрэн эрхийг түдгэлзүүлсэн ч Үндсэн хуулийн шүүх түүнийг нь суудалд нь үлдээсэн.

Түүний бүрэн эрх дууссаны дараа 2009 онд авлигын хэрэгт холбогдуулан шалгаж эхэлсэн бөгөөд энэ үеэр тэрээр хаднаас үсэрч амиа хорлосон юм. 

И Мён Бак. Түүний хувьд бүрэн эрхийнх нь хугацаа дууссаны дараа Ерөнхийлөгчөөр ажиллаж байх хугацаандаа хахууль авсан, хөрөнгө завшсан, эрх мэдлээ урвуулан ашигласан зэрэг хэрэгт холбогдуулан 2018 онд 15 жилийн хорих ял оноосон. Гэхдээ 2022 онд одоогийн Ерөнхийлөгч Юн Сок Ёль эрүүл мэндийн байдлыг нь харгалзан үзэж өршөөл үзүүлэн сулласан юм.
Пак Гён Хи. 2013-2017 онд алба хашсан тэрбээр БНСУ-ын анхны эмэгтэй Ерөнхийлөгч болсон бөгөөд гурав дахь Ерөнхийлөгч Пак Чун Хэгийн охин. Анхлан Пак Гён Хигийн дотнын найз Чой Сон Шилийн охин их сургуульд элсэлтийн шалгалтгүйгээр орж, хичээлдээ суудаггүй ч өндөр үнэлгээ авч байсныг илрүүлснээр оюутнууд эсэргүүцэн жагссан юм.
Мөн найз Чойг Ерөнхийлөгчтэй дотно харилцаагаа ашиглан компаниудыг өөрийнх нь удирддаг ашгийн бус сангуудад олон сая воны хандив өгөхийг дарамталсан гэж үзсэн. Харин Ерөнхийлөгч Пакийг үүнд нь биечлэн оролцож, найздаа албан бичиг баримтуудыг зөвшөөрөлгүйгээр танилцуулсан хэмээн буруутгасан.

Түүнийг огцруулах парламентын гишүүдийн саналыг Үндсэн хууль шүүх дэмжиж, түүнийг огцруулсан. Үүний дараа Пакт 20 жилийн хорих ял оноосон ч дараагийн Ерөнхийлөгч Мүн Жэ Ин түүнд өршөөл үзүүлж, сулласан. 

Юн Сок Ёль. 2022 онд БНСУ-ын ерөнхийлөгчөөр сонгогдсон түүнийг 2025 оны дөрөвдүгээр сарын 4-ний өдөр Үндсэн хуулийн шүүх огцруулах эцсийн шийдвэрийг гаргалаа. Тэрбээр 2024 оны арванхоёрдугаар сард цэргийн дэглэм тогтоох зарлиг гаргасан нь түүний уналтын гол шалтгаан болов. 

Шүүхээс түүнийг онц байдал зарлахдаа хуулийг дагаж мөрдөөгүй, ардчиллыг зөрчсөн үйлдэл гаргасан хэмээн танилцуулсан. Мөн түүнийг мөрдөн шалгаж байсан бөгөөд 2025 оны нэгдүгээр сард баривчилсан. Улмаар тэрбээр бүрэн эрхийнх нь хугацаа дуусаагүй байхад баривчлагдсан анхны ерөнхийлөгч болсон юм.