Уул уурхайн бүтээгдэхүүний экспортыг богино хугацаанд эрчимжүүлэх, валютын нөөцийг нэмэгдүүлэх үүрэг бүхий  ажлын хэсэг томилолтын хүрээнд Шивээхүрэн-Сэхэ боомтын нарийн царигийн төмөр замын хил холболтын бүтээн байгуулалттай танилцжээ. 

Мөн Шивээхүрэн чингэлэгт терминал, AGV тээвэр болон “Тэлмэн Ресурс” компанийн хэрэгжүүлж буй нүүрсний давхаргын метан хийн төслийн талбайгаар зочилж, төслийн явцыг үзсэн байна.

Нүүрсний давхаргын метан хий илрүүлэх гурван төсөл Өмнөговь аймагт хэрэгжиж байна. Энэ хийг ашигласнаар агаарын бохирдлыг багасгах, эрчим хүч, дулааны шинэ эх үүсвэр бий болох боломжтой.

Монгол орны нөхцөлд нүүрсний давхаргын метан хийн хайгуул судалгааг Канадын "Шторм Кат Энержи" компани анх  гүйцэтгэсэн юм. Энэ компани 2004 онд Газрын Тосны Хэрэг Эрхлэх Газартай байгуулсан бүтээгдэхүүн хуваах гэрээний дагуу Өмнөговь аймгийн Гурвантэс сумын нутаг Ноён уулын районд метан хийн хайгуул судалгааны ажлыг явуулжээ.

Судалгааг 144км урт 10-20км өргөн талбайд явуулж, зураглал зохиосон. 

Зураглалын талбайд 250 метр хүртэл гүнтэй цооног өрөмдөж, нүүрсний давхаргын байршил чанарыг тогтоосон. 2004-2005 онд Нарийн Сухайтын ордын орчимд 600-700 метрийн гүнтэй 4 цооног, Эрдэнэбулгийн ордод 1 цооног өрөмдөж нүүрсний метан хийн агуулга болон давхаргын зузааныг илүү нарийвчлан тогтоожээ. 

Судалгааны дүнд үндэслэн нүүрсний нийт зузаан 76,6 метр, витринитийн ойлтын зэрэг 0,62%, хийн агууламж 75,7-379,9 куб фут/тонн, зэрэглэлийн хувьд дэгдэмхий бодис ихтэй, чулуун нүүрс болохыг тогтоожээ. 

Мөн тухайн талбайн нүүрсний метан хийн нөөц баялаг нь 0,6-1,2 триллион куб фут, дунджаар 0,9 куб фут гэж тогтоосон. Насны хувьд АНУ-ын Сан Жуаны сав газрын нүүрстэй төстэй гэж үзжээ.

Тус компани Улаанбаатар хотын ойролцоо Налайхын нүүрсний ордыг оролцуулан Төв аймгийн Цайдам нуурын районы 28 мянган хавтгай дөрвөлжин км талбайд бүтээгдэхүүн хуваах гэрээний дагуу судалгааны ажлыг 2005 онд эхэлсэн боловч, зарим урьдчилсан судалгааны ажил хийснээр энэ төсөл зогссон юм.