Манай шилдэг жүдочдын нэг Д.Нямхүү УАШТ-д барилдахгүй нь тодорхой болсон үед энэ жинд түрүүлэх магадлалтай хэмээн дөрвөн залуугийн нэрийг учир мэдэх хүний амнаас сонсож байв. Үнэхээр ч тэр дөрөв нь медалийн тавцанд эгнэн зогсож, энэ дундаас Г.Хүдэрмөнх алтан медаль зүүсэн юм.

Барилдааны арга барилаас гадна үсний этгээд засалт, дүр төрхөөр нь УАШТ-ийг үзсэн хүмүүс түүнийг санаж байж болох. Жүдо бөхийн 2008 оны УАШТ-ий 81 кг-д түрүүлсэн залуу тамирчин Ганбаатарын Хүдэрмөнхийг уншигч та бүхэнтэй уулзуулъя.

-Бөхийн хүрээнийхэн өөрийг чинь улсын аварга болсонд нэг их гайхахгүй байгаа. Харин спорт сонирхогчид таныг төдийлэн сайн танихгүй болов уу? Юуны өмнө өөрийгөө танилцуулна уу?
-Би 1987 оны дөрөвдүгээр сарын 16-нд Улаанбаатарт төрсөн. 2000 оноос жүдо бөхөөр хичээллэж байна. 2003 онд өсвөр үеийн УАШТ болон хүүхдийн спортын наадамд 73 кг-д түрүүлж байв. Өнгөрсөн жил томчуудын УАШТ-ээс хүрэл медаль авсан. Мөн курашийн ДАШТ-ий мөнгөн медальтай.

-Жүдочид самбо бөхөөр давхар барилдах нь нийтлэг. Харин таны хэлсэн амжилт дунд самбын медаль алга?
-Яагаад ч юм, самбо бөхөөр сайн барилддаггүй. Өсвөрийн УАШТ-ээс нэг удаа хүрэл зүүж байсан.

-Танай гэрийнхнээс спортоор хичээллэдэг хүн бий юү?
-Аав (Ш.Ганбаатар) самбо бөхөөр барилддаг байсан. 1980-аад онд ДАШТ-ээс мөнгө, хүрэл медаль авч байсан гэдэг. Намайг “Аварга”-д Х.Болдбаатар, Д.Маралгэрэл багш нарын гарт өгч байсан юм. Өөр спортын хүн байхгүй. Ам бүл тавуулаа. Эгч эмэгтэй, дүү эрэгтэй (инээв).

-Таныг Японд сүмогийн сургуульд байсан гэж сонссон. Яагаад гэнэт жүдогоо өөр төрлөөр солив?
-2003 оны наймдугаар сарын 7-ны өдөр байсан. “Аварга”-ын чөлөөт бөхийн багш бэлтгэл дээр орж ирээд “Японоос сүмогийн багш ирээд шалгаруулалт хийж байна. Очоод үзээч” гэсэн. Би өөрөө дургүй байсан ч юу ч гэсэн шалгуулъя гэж бодоод очиход шууд авсан. Аавдаа хэлэхэд зөвшөөрөөд Японыг зорьж байлаа. Аоморигийн Ямада ахлах сургуульд гурван жил болсон.

-Тэнд байхад бэлтгэл, хичээл гээд хүнд байв уу? Хэр амжилт гаргасан бэ?
-Япон хэлний бэлтгэлээс өөр хичээл байгаагүй. Тэмцээн, уралдаан гээд өөр муж, хотоор их явна. Амжилт нэг их шалиагүй ээ. УАШТ-д нь нэг удаа 16-д үлдсэн байх. Тэгэхдээ Ж.Ганболд зааны хүү Г.Ганнямд ялагдсан. Тэмцээн их болно, олон ч хүн ордог юм билээ. Би дөрөв ялж байж 16-д үлдсэн.

-Японд суралцаж, тэр тусмаа сүмогоор хичээллэж байсны хувьд мэргэжлийн сүмод орох бодол байгаагүй юү?
-Үгүй ээ. Харин сургуулиа төгсөх үеэс мэргэжлийн бөхөд оръё гэж бодоод Токиогийн нэг клубт очиж шалгалт өгч тэнцсэн. Тэр клубтэй гэрээ байгуулаад Монголдоо амрахаар ирэхэд аав, ээж зодолдохыг зөвшөөрөлгүй үлдээсэн.

-Сая УАШТ-д Д.Нямхүү барилдахгүй гэхэд түрүүлэх тухай бодож байв уу?
-Би нэг их юм бодоогүй. Харин багш нар, “Алдар”-ын удирдлагууд үүрэг, даалгавар өгч байсан. “Алдар”-ын орлогч дарга Д.Цог-Эрдэнэ гуай Анхаа (Р.Анхбаатар) бид хоёрыг заавал аваргын төлөө үлд гэж тушаасан. Ямартай ч түүнийг нь биелүүлсэн.

-Удахгүй Францад супер дэлхийн цомд оролцох нь. Энэ нь жүдогоор анхны ОУТ тань болох уу?
-Харин тийм. Анх олон улсад өрсөлдөхдөө Европын том тэмцээнд хүч үзэх гэж байна. Бичлэг үзэж байхад европчуудын барилдаан эвгүй юм шиг харагддаг. Одоо л биеэрээ үзэх нь дээ.

-Курашийн ДАШТ-ээс мөнгөн медаль авсан. Харахад жүдотой адил юм шиг атлаа хөл авч болохгүй гээд нэлээн ялгаатай энэ бөхөөр барилдах ямар байв?
-Үүрэхдээ сурцаараа өмднөөс барьчихаад байсан. Хоёр ялж мөнгөн медальд хүрсэн.

-Өмнөө тавьсан зорилго гэвэл?
-Олимпоос медаль авна, дэлхийн аварга болно гэж амлаад яах вэ. Ямар ч байсан өөрийн хүрэх дээд хязгаарыг үзэхийн төлөө хичээнэ дээ.

-Ярилцсанд баярлалаа. Танд амжилт хүсье.
-Энэ дашрамд “ТЦ” сониноор дамжуулан тусалж, дэмждэг багш, найз нөхөд, гэр бүлийнхэндээ талархал илэрхийлье. Мөн найз Б.Хишигбаяртаа хөөрхөн хүүхэдтэй болоорой гэж хүсье.

Ж.Батмөнх