Засгийн газар өнөөдөр ээлжит бус хуралдаан хийж дараах шийдвэрийг гаргажээ. Шийдвэрийн талаар Засгийн газрын Хэрэг эрхлэх газрын дарга С.Бямбацогт танилцуулж байна. 

ЗГХЭГ-ын дарга С.Бямбацогт "Засгийн газрын бүтэц бүрэлдэхүүний тухай хуулийг өөрчлөх эсэх асуудлыг хэлэлцэж УИХ-д өргөн мэдүүллээ. Өөрчлөлтийг өөрсдөөсөө эхэлье буюу данхар бүтцийг дарга нараас эхлээд цомхотгоно. Төрийн албыг цомхон, чадварлаг, бүтээмжтэй болгох зорилт тавьж байна. Мөн яамдын орон тоог цөөлөх асуудлыг авч хэлэлцлээ" гэв.

Өмнөх Засгийн газар 22 сайдтай байсан бол энэ Засаг 19 сайдтай ажиллаж байна. 60 орчим үндэсний хорооны тал хувийг нь татан буулгах шийдвэр гаргажээ. Мөн Монгол Улсын 16 яаманд 1900 гаруй албан хаагч ажиллаж байгааг 20 орчим хувиар бууруулахаар болжээ. 

Энэ цомхотголд төрийн ямар алба хаагчид хамрагдах талаар дэлгэрэнгүй мэдээллийг дараа нь өгнө. Судалгаа, тооцоолол сайтар хийх шаардлагатай гэв. Тухайн ажилтны ажлын чиг үүргийг мөн харгалзаж үзэх аж.